एजेन्सी । इंग्लिस प्रिमियर लिग फुटबलमा लिभरपुलले बराबरी खेलेको छ । शनिबार राति सम्पन्न खेलमा लिभरपुलले ब्राइटनसँग ३-३ गोलको बराबरी खेल्दै अंक बाँडेको हो ।
लिभरपुलका लागि रोबर्टो फिर्मिनोले दुई गोल गरे भने ब्राइटनका लागि तिनै गोल लिन्ड्रो ट्रोसार्डले गरे । लिभरपुलको घरेलु मैदान एनिफल्डमा भएको खेलमा चौंथो मिनेटमा नै ट्रोसार्डले गोल गर्दै ब्राइटनलाई सुरुवाती अग्रता दिलाएका थिए ।
१७ औं मिनेटमा ट्रोसार्डले नै गोल गर्दै ब्राइटनको अग्रता दोब्बर पारे । ३३ औं मिनेटमा फिर्मिनोले गोल गर्दा लिभरपुल २ १ ले पछि पर्यो । ५४ औं मिनेटमा फिर्मिनोले गोल गर्दै खेललाई २-२ को बराबरीमा लगे ।
६३ औं मिनेटमा ब्राइटनका एडम वेब्स्टरले आत्मघाती गोल गरेपछि लिभरपुल ३-२ ले अघि बढ्यो । यता, ८३ औं मिनेटमा ट्रोसार्डले गोल गर्दै ब्राइटनलाई हार बाट जोगाए भने उनले ह्याट्रिक समेत पूरा गरे ।
बराबरीसँगै ७ खेलबाट १४ अंकसहित ब्राइटन चौँथो स्थानमा छ भने समान खेलबाट लिभरपुल १० अंकसहित नवौँ स्थानमा छ ।
