काठमाडौँ । पर्यटनमन्त्री जीवनराम श्रेष्ठलाई लाइनमा मिलाउँदा ‘गल्ती’ गरेका सुरक्षा गार्ड शेरजंग गुरुङ अहिले प्रहरी हिरासतमा छन् ।
हिरासतमै पुगेर उनलाई राष्ट्रिय स्वतन्त्र पार्टीका अध्यक्ष रवि लामिछानेले भेट गरेका छन् । लामिछानेले भेटघाटको तस्बिर सामाजिक सञ्जालमा पोस्टसमेत गरेका छन् । भेटमा लामिछानेले कानून सबैलाई बराबर हुनुपर्ने भन्दै कानून लागु गरेकामा उनलाई धन्यवाद दिन गएको बताएका छन् ।
भेटमा सुरक्षा गार्ड गुरुङको भनाई उद्धृत गर्दै लेखेका छन्, “गुरुङको छोरो, आवाज अलि ठूलो भयो होला, तर मैले कुनै दुर्व्यवहार गरेको छैन ।”
उनले आफूले मन्त्रीलाई नचिनेको समेत बताएका छन् । यद्यपि गुरुङले मन्त्री भएर चिनेकै भए पनि आफ्नो ड्युटी पूरा गरेको बताए । लामिछानेले गुरुङलाई ससम्मान रिहा गर्न माग गरेका छन् ।
लामिछानेले भनेका छन्, “उहाँलाई दण्डित होइन पुरस्कृत गरियोस् । नियम मिचेर लाइन नबस्ने मन्त्रीलाई चाहिँ कानून नमानेको अभियोगमा अनुसन्धान गरियोस् ।”
पर्यटनमन्त्री श्रेष्ठलाई लाइनमा बस्न लगाउँदा उत्पन्न विवादपछि गुरुङलाई पक्राउ गरी हिरासतमा लिइएको थियो ।
फोटो- दिपक बोहोराको फेसबुकबाट
