काठमाडौं । काठमाडौं महानगरभित्रका क्यासिनोहरूलाई ७ दिन भित्र कर तिर्न काठमाडौं महानगरपालिकाले म्याद दिएको छ ।
महानगर राजस्व विभागका निर्देशक शिवराज अधिकारीले एक साताको अल्टिमेटम दिएर कर बुझाउन ७ वटा क्यासिनोलाई पत्र काटेका हुन् ।
महानगरले पटक पटक ताकेता गर्दा पनि आर्थिक वर्ष २०७५/७६ देखि हालसम्म कर नबुझाएको हुँदा प्रदेश आर्थिक ऐनले तोकेको दररेटमा हालसम्मको बाँकी मनोरञ्जन करको विवरण र सोको नियमानुसार लाग्ने जरिबानासमेत ७ दिनभित्र कर तिर्न अनुरोध गरेको छ । ७ दिनभित्र कर नतिरे महानगरपालिकाको राजस्व ऐन, २०७५ बमोजिम कारबाही गरी बाँकी कर असुलउपर गरिने पत्रमा उल्लेख छ ।
महानगरको ताकेताको बेवास्ता गरेपछि र्याडिसन, अन्नपूर्ण, म्यारियट, हायात, सोल्टी, एलफ्ट र मल्ल होटलका क्यासिनोलाई म्यादसहितको पत्र पठाइएको हो ।
