इङलिस प्रिमियर लिग अन्तर्गत शनिबार राति भएको खेलमा गत वर्षको लिग बिजेता म्यान्चेस्टर सिटीलाई एस्टन भिल्लाले बराबरीमा रोकेको छ । नब्बे मिनेटको खेलमा दुबै टिमबाट एकएक गोल मात्र भएका थिए ।
निकै आक्रामक रुपमा खेले पनि सिटी विजयी हुन सकेन, र महत्वपूर्ण तीन अंक गुमायो । पहिलो गोल भने ५० औं मिनेटमा सिटीका लागि निकै फर्ममा रहेका एर्लिङ हालान्डले गरेका थिए । यस सिजनमा हालान्डले २ ह्याट्रिक सहित १० गोल गरिसकेका छन् ।
तर ७४ औं मिनेटमा एस्टनका लागि लियोन बेलीले बराबरी गोल गरेका थिए ।
यो बराबरीसँगै म्यान्चेस्टर सिटीले ६ खेलबाट १४ अंक बनाई दोस्रो स्थानमा चित्त बुझाउनु परेको छ ।
शनिबार साँझ नै भएका अन्य खेलहरुमा चेल्सी, टोटेनह्यामले महत्वपूर्ण जित निकालेका छन् । तर लिभरपुल भने एभर्टनसँग बराबरीमा रोकिएको छ ।
लिगको यस सिजनमा चेल्सीले ६ खेलबाट १० अंक जोड्दै पाँचौं स्थानमा उक्लेको छ । वेस्टह्याम युनाइटेडसँगको संघर्षपूर्ण खेलमा चेल्सी २–१ ले विजयी भएको हो । चेल्सीका लागि बेन चिल्वेलले ७६ र काई हावार्जले ८८ औं मिनेटमा गोल गरेका थिए ।
तर पहिलो गोल भने वेस्टह्यामका लागि मिखाइल एन्टोनियोले ६२ औं मिनेटमा गरेका थिए । वेस्टह्यामका म्याक्सवेल कोर्नेटले गरेको गोललाई रेफ्रीले मान्यता दिएका थिएनन् ।
अर्कोतर्फ, टोटेनह्यामले फूलह्यामलाई २–१ ले पराजित गरेको थियो । टोटेनह्यामका लागि होयबर्गले ४० र ह्यारी केनले ७५ औं मिनेटमा गोल गरेका थिए भने फूलह्यामका लागि एक मात्र गोल अलेक्सान्डर मिट्रोभिकले ८३ औं मिनेटमा गोल गरेर टोटेनह्याममाथि दबाब सिर्जना गरेका थिए ।
यो जितसँगै टोटेनह्यामले ६ खेलबाट १४ अंक बटुल्दै लिगको तेस्रो स्थानमा उक्लेको छ । पहिलो स्थानमा रहेको आर्सनलले ५ खेलबाट १५ अंक बनाइसकेको छ, र आर्सनल यस सिजनमा अपराजित छ ।
अन्य खेलहरुमा ब्रेन्टफोर्डले लिड्सलाई ५–२ ले पराजित गरेको छ भने बोर्नमाउथले नटिङघम फोरेस्टलाई ३–२ तथा उल्भ्सले साउथह्याम्प्टनलाई १–० गोल अन्तरले पराजित गरेका थिए । क्रिस्टल प्यालेस र न्यूक्यासलबीचको खेल भने बराबरी (०–०) मा सकिएको थियो । एजेन्सी
