दैलेख । कविरामले ३३ वर्षपछि आफ्नै नाममा नागरिकता पाएका छन् । उनको पुरानो नागरिकतामा उनको नाम ‘कुकुर कामी’ उल्लेख थियो ।
जिल्ला प्रशासन कार्यालय दैलेखले भगवतीमाई गाउँपालिका– ३ मेहेतोलीका कविराम कामीलाई नयाँ नागरिकता प्रदान गरेसँगै पुरानो नागरिकताका कारण अपमानित उनी खुशी देखिएका छन् ।
गृह मन्त्रालयले अपमानजनक नाम भएका नागरिकताबारे आवश्यक प्रक्रिया पूरा गरी पुनः नयाँ नागरिकता दिन जिल्ला प्रशासन कार्यालयलाई निर्देशन दिएपछि जिल्ला प्रशासन कार्यालय दैलेखले कविराम कामी नाम उल्लेख गरी नागरिकता प्रदान गरेको हो ।
उनको नागरिकतामा तत्कालीन प्रधानपञ्चको सिफारिसमा २०४६ जेठमा ‘कुकुर कामी’ लेखिएको थियो । उनलाई आइतबार प्रमुख जिल्ला अधिकारी हरि प्याकुरेलले नयाँ नामसहितको नागरिकता प्रदान गरेका हुन् । प्रजिअ प्याकुरेलले ‘कुकुर कामी’ नामका अन्य प्रमाणहरु खारेज गरिने जानकारी दिए ।
