काठमाडौँ । काठमाडौँ महानगरपालिकाका प्रमुख बालेन्द्र साहले वर्षौंदेखि अव्यवस्थित भएको फोहोरलाई व्यवस्थित गर्दा चरणबद्धरुपमा नयाँ नयाँ किसिमका व्यवधान ल्याइने प्रयास भइरहेको बताएका छन् ।
सामाजिक सञ्जाल फेसबुकमा उनले पोस्ट गर्दै यसै क्रममा हिजो राति फोहर व्यवस्थापनमा प्रयोग हुने साधनहरुको तोडफोड भएको उल्लेख गरेका छन् । उनले लेखेका छन्, “फोहर व्यवस्थापनप्रति हामी सुरुआतदेखि नै संवेदनशील र क्रियाशील छौँ। यो हाम्रो पहिलो प्राथमिकताको कुरा हो । फोहोर व्यवस्थापनलाई निष्कर्षमा पुग्न नदिन गरिएको पछिल्लो चलखेलका रुपमा हामीले यसलाई लिएका छौँ ।”
कानूनीरुपमा पनि फोहर बोक्ने साधनहरुको तोडफोड जघन्य अपराध हो भन्दै महानगर प्रमुख साहले कानूनबमोजिम अपराधीहरुलाई कडाभन्दा कडा कारबाही हुनै पर्छ भन्नेमा महानगर स्पष्ट रहेको बताएका छन् । उनले भनेका छन्, “तोडफोड गर्नेहरुबाट नै यसको भरपाइ तथा क्षतिपूर्ति गराउनुपर्छ । यसका लागि महानगरले सम्बन्धित संयन्त्र तथा निकायहरुसँग समन्वय गरिरहेको छ ।”
केही व्यक्ति वा समूहको स्वार्थपूर्तिका लागि लाखौँ नागरिक तथा २१ वटा पालिकाहरुको फोहरलाई अव्यवस्थित र असरल्ल पार्न सकिँदैन भन्दै विभिन्न बहानामा फोहर व्यवस्थापनमा अवरोध गर्ने प्रयास कसैलाई पनि नगर्न अनुरोध गरेका छन् ।
