काठमाडौँ । असमान ढंगले तलबमान निर्धारण गरिएको विरोधमा असन्तुष्ट नायब सुब्बाहरुले अर्थमन्त्री जनार्दन शर्मालाई एसएमएस पठाएका छन् । उनीहरुले आफूहरु हेपिएको भन्दै कर्मचारी पोशाक लगाउन र कार्यालय जान नमानेको एसएमएसमा बताएका छन् । तलब बढाउँदा सबै तहको समान हुने गरि मात्रै बढाउन उनीहरुको माग छ ।
उनीहरुले पठाएको एसएमएसमा लेखिएको छ, “मन्त्रीज्यू नमस्कार, म एकजना हेपिएको नासु परेँ, नयाँ तलबमानको जुन हल्ला आयो त्यसपछि न कर्मचारीको ड्रेस लगाउन मन लाग्छ न कार्यालय जान । निजामती सेवा ऐनमा झन नासुको पदपूर्तिमा गर्न लागेको व्यवस्थाले साह्रै चिन्तित तुल्याएको छ । त्यसकारण हजुर हामीमाथि भइरहेको विभेदको मनन गरी हाम्रा मागप्रति ध्यान आकर्षण गरिदिनुहुन विनम्र अनुरोध छ ।”
नासुहरुले संघीय निजामती सेवा ऐनको मस्यौदामा अधिकृत पदको पदपूर्तिका लागि विभेदपूर्ण व्यवस्था राखिएको भन्दै त्यसलाई सच्याउनका लागि पहल गरिदिन पनि अर्थमन्त्री शर्मासँग माग गरेका छन् ।
अधिकृत पदमा खुल्लाबाट ५० प्रतिशत, बढुवाबाट ३० प्रतिशत र आन्तरिक प्रतिस्पर्धाबाट २० प्रतिशत पदपूर्तिको व्यवस्था संघीय निजामती सेवा ऐनमा राख्नका लागि पहल गरिदिनसमेत उनीहरुले अनुरोध गरेका छन् । हाल कार्यान्वयनमा रहेको निजामती सेवा ऐन, २०४९ मा अधिकृत पदमा पदपूर्ति गर्दा खुलाबाट ७० र बढुवाबाट ३० प्रतिशत गर्ने व्यवस्था छ । त्यसमा आन्तरिक प्रतिस्पर्धाको व्यवस्था राखिएको छैन ।
अहिले बनाइएको संघीय निजामती सेवा ऐनको मस्यौदामा पनि अधिकृत पदमा आन्तरिक प्रतिस्पर्धा राखिएको छैन । यो मस्यौदामा नासुभन्दा माथिल्लो अधिकृत पदमा पदपूर्ति गर्दा खुल्लाबाट ९० र बढुवाबाट १० प्रतिशत गर्ने व्यवस्था छ ।
संघीय निजामती सेवा ऐनको मस्यौदामा अधिकृत पदको पदपूर्तिका लागि विभेदपूर्ण व्यवस्था राखिएको उनीहरुले बताएका छन् । त्यसलाई सच्याउनका लागि पहल गरिदिन पनि उनीहरुले अर्थमन्त्रीसँग माग गरेका छन् । खरिदारहरु र अधिकृतहरुका लागि माथिल्लो पदमा प्रतिस्पर्धा गर्दा आन्तरिक प्रतिस्पर्धाको व्यवस्था राखिएको तर आफूहरुका लागि नराखिएको उनीहरुको गुनासो छ ।
तलब र पदपुर्तिमा विभेद गरिएको भन्दै नासुहरुले सोमबार सिंहदरबारभित्र ‘पेन डाउन’ गरेका थिए । आज उनीहरुले मुख्य सचिव, अर्थमन्त्री, सामान्य प्रशासन मन्त्री र अर्थ मन्त्रालयका सचिवलाई एसएमएस पठाएर दबाब दिएका छन् ।
