काठमाडौं । काठमाडौं महानगरपालिकाका पूर्व प्रमुख विद्या सुन्दर शाक्यले मानवसेवा आश्रमको नागार्जुन नगरपालिका वडा नं.१, एकलटारमा रहेको शाखामा विहानको भोजनसेवा गराएका छन् ।
नगरप्रमुखको रुपमा रहँदा मानवसेवा आश्रम र काठमाडौं महानगरपालिकाको साझेदारीमा भइरहेको कार्यको स्मरण समेत गर्दै आगामी दिनमा जोश र जाँगर सहितको नयाँ नेतृत्वबाट सडकआश्रित मानवहरुको व्यवस्थापनको लागि मानवसेवा आश्रमसँग साझेदारीको लागि समेत अपिल गरेका छन् ।
कार्यक्रममा बोल्दै शाक्यले वि।स २०७४ सालदेखि काठमाडौं महानगरपालिका र मानवसेवा आश्रमको साझेदारी र उनको कार्यकालमा भएको प्रगतिको बारेमा जानकारी गराएका थिए ।
“मेरो नेतृत्वमा महानगर हुँदा मानवसेवा आश्रमको बारेमा जानकारी पाएपछि सामाखुसीमा रहेको आश्रमको अवलोकन गरेँ । त्यसपछि सडकआश्रित मानवहरुको व्यवस्थापनका लागि मानवसेवा आश्रमसँग साझेदारी गरेर धेरै काम ग¥यौँ ।” शाक्यले भने ।
उनले नयाँ नेतृत्वले मेरो कार्यकालमा भएका राम्रा कार्यक्रमको निरन्तरता र गर्न नसकेका कामहरु हुने अपेक्षा समेत व्यक्त गरे ।
उनको कार्यकालमा मानवसेवा आश्रमले २०७४ सालमा सामाखुसी र बुढानिलकण्ठमा रहेको दुईवटा घरको घरभाडा तिर्ने सम्झौता भएदेखि हालसम्म भाडा तिर्नुपर्ने घरको घरभाडा महानगरपालिकाले नै व्यवस्थापन गर्दै आएको छ ।
साथै काठमाडौं महानगरपालिकामा रहेका वास्तविक सहयोगापेक्षी मानवहरुको उद्धार गरि आश्रमसम्म ल्याउन र अस्पतालसम्म लैजानका लागि महानगरपालिका र आश्रमको संयुक्त लगानीमा उद्धार वाहनको व्यवस्था भएको थियो ।
काठमाडौं महानगरपालिकाले पूर्ण आर्थिक व्यवस्थापन गर्ने गरि आसपासका स्थानीय तहमा जग्गा उपलब्ध गराउन पहल ग¥यो । पहिले बुढानिलकण्ठ नगरपालिका त्यसपछि तारकेश्वर नगरपालिकामा जग्गा उपलब्ध हुन नसक्दा अन्त्यमा नागार्जुन नगरपालिकाले व्वाइट गुम्बामा १६ रोपनी जग्गा उपलब्ध गरायो । त्यसमा शहरी योजना आयोगले इन्जिनियरिङ डिजाइनको कार्य गरि नागार्जुन नगरपालिकाको समन्वयमा भवन निर्माणको कार्य सुरुवात हुँदै छ ।
भवन निर्माणको टेण्डर प्रक्रिया सम्पन्न भई छिट्टै सुरु हुँदै छ । यस भवनको स्वामित्व नागार्जुन नगरपालिकाको रहने गरि भवन मानवसेवा आश्रमले सडकआश्रित मानवहरुको व्यवस्थापनका लागि प्रयोग गर्ने छ ।
उक्त भवन निर्माण गर्नका लागि काठमाडौं महानगरपालिकाले विगत २ बर्षदेखि बजेट विनियोजन गर्दै आइरहेको र त्यसको काजगी प्रक्रिया सम्पन्न नभइसकेकोले निर्माण कार्य हुन सकेको थिएन । यसको लागि सोहि निरन्तरता गर्दै यस आर्थिक बर्षमा काठमाडौं महानगरपालिकाले भवन निर्माण शीर्षकमा रु। ५ करोड विनियोजन गरेको छ ।
नागार्जुन नगरपालिकाले ठेकेदार छनोट गरि कुल अनुमानित लागत १२ करोड रहेको भवनको करिब ८ करोडमा १८ महिना भित्रमा निर्माण सम्पन्न गर्ने गरि सम्झौता गरिसकेको छ ।
