एजेन्सी । क्यानडाको ब्रिटिस कोलम्बिया प्रान्तको लाङ्ली सहरमा विभिन्न ठाउँमा गोली चल्दा दुई सर्वसाधारणको मृत्यु भएको छ भने दुई जना घाइते भएका छन् ।
प्रहरीले आक्रमणकारीलाई पनि मारेको छ । क्यानडाको समय अनुसार सोमबार बिहान यो घटना भएको हो । नेपाल र क्यानडाबीच ९ः४५ घण्टाको अन्तर छ । अर्थात् नेपाली समय अनुसार सोमबार बिहान ९ः४५ देखि ३ः४५ बजेको बीचमा यो घटना भएको हो ।
प्रहरीका अनुसार भ्यानकुभर नजिकैको ल्याङ्ली सहरमा आइतबार–सोमबारको मध्यरातमा गोलीबारी सुरु भएको थियो । एक आक्रमणकारीले राति १२ बजेदेखि बिहान ६ बजेसम्म सहरका करिब ५ स्थानमा घरबारविहीन मानिसहरूलाई निशाना बनाएका थिए ।
आक्रमणकारीले चार जनालाई गोली हाने, जसमध्ये दुई जनाको घटनास्थलमै मृत्यु भएको थियो, जबकि एक पुरुष र एक महिला गम्भीर घाइते भएका थिए । महिलाको अवस्था चिन्ताजनक रहेको बताइएको छ ।
