काठमाडौं । संसदीय छानबिन समितिको बैठक सुरु भएको छ ।
अर्थ मन्त्रालयको सीसीटीभी फुटेजमाथि विश्लेषण गर्न आजै बिहान पनि बैठक बसेको थियो । केहीबेरअघि सुरु भएको बैठकमा नेपाल प्रहरीको विधिविज्ञान प्रयोगशालाका विज्ञहरु पनि सहभागी हुनेछन् ।
बिहान बसेको समिति बैठकले फुटेजमा देखिएका दृश्यहरु प्रस्ट नभएकाले प्रयोगशालाका विज्ञहरुलाई बोलाउने निर्णय गरेको थियो । सोहीबमोजिम अहिले विज्ञहरुसँग छलफल गर्न लागिएको हो भने विज्ञहरु छलफलका लागि सिंहदरबार प्रवेश गरिसकेका छन् ।
अर्थ मन्त्रालयको गत जेठ १४ गतेको सिसिटिभी फुटेज ‘रिकभर’ भएको छ । पूर्वअर्थमन्त्री जनार्दन शर्मालाई छानबिन गठित समितिले फरेन्सिक ल्यावको रिपोर्ट खोलेको थियो ।
संसदीय विशेष समितिलाई नेपाल प्रहरीको विज्ञ टोलीले जेठ १४ गतेको ५१ वटा भिडियो फुटेज रिकभर गरेर बुझाएको हो ।
रिपोर्टमा १४ गते रातिकै सिसिटिभी फुटेज भएको उल्लेख भए पनि कुनै पनि भिडियो नबुझिने र फुजेट ५० वटाभन्दा टुक्रामा छ ।
ती क्लिपहरु केही सेकेन्डको रहेको र राम्रोसँग स्पष्ट नदेखिने छ । फुटेजमा मान्छेहरु आहोरदोहोर गरेको जस्तो देखिए पनि स्पष्ट देखिँदैन ।
बजेट निर्माणका दिन गत जेठ १४ गते मध्यरात अनाधिकृत व्यक्तिलाई सम्लग्न गराइएको र करको दर हेरफेर गरिएको आरोप तत्कालीन अर्थमन्त्री जनार्दन शर्मामाथि लागेको थियो ।
सोही आरोपमाथि छानबिन गर्न संसदीय विशेष छानबिन समिति गठन गरिएको थियो ।
