काठमाडौँ । सरकारी छाप र दस्तखत कीर्ते मुद्दामा दोषी ठहर भएपछि नेकपा (एमाले) बाट निर्वाचित प्रदेशसभा सदस्य गुलेफुन खातुन पदमुक्त भएकी छन् । सो सम्बन्धी मुद्दामा जिल्ला र उच्च अदालतले गरेको फैसलालाई सर्वोच्च अदालतले सदर गरेपछि उनको प्रदेशसभा सदस्य पद गुमेको हो ।
जिल्ला अदालतले गरेको फैसलालाई उच्च अदालत विराटनगरले सदर गरेपछि त्यसमा चित्त नबुझेको भन्दै खातुनले सर्वोच्च अदालतमा निवेदन दिएकी थिइन् । सर्वोच्च अदालतले उनको निवेदनलाई खारेज गरिदिएपछि उनको पद गुमेको हो ।
गत जेठ २५ गते सर्वोच्च अदालतका न्यायाधीशद्वय सुष्मालता माथेमा र नहकुल सुवेदीको इजलासले खातुनको निवेदनमा मागअनुसार दाबी नपुगेको भन्दै मुद्दा दोहोर्याउन अनुमति नदिने आदेश दिएको थियो ।
