एजेन्सी । आइतबार साँझ भारतको उत्तराखण्डस्थित उत्तरकाशीमा बस खाल्डोमा खसेर दुर्घटना भएको छ । जसमा मध्य प्रदेशको पन्ना जिल्लाका २८ तीर्थयात्री र चालक–क्लिनरसहित ३० जना सवार थिए ।
उत्तराखण्डका मुख्यमन्त्री पुष्कर सिंह धामीका अनुसार दुर्घटनामा २६ जनाको मृत्यु भएको छ । हरिद्वारबाट तिर्थयात्रा सुरु गरेको बसमा सवार सबै यात्रु चारधाम यात्रामा जाँदै थिए ।
बसमा चालक र क्लिनरबाहेक १४ पुरुष र १४ महिला सवार थिए । उक्त बस दुर्घटनामा केन्द्रीय गृहमन्त्री अमित शाहले दुःख व्यक्त गरेका छन् । भक्तजनले भरिएको बस खाडलमा खसेको अमित शाहले बताएका छन् ।
यसैबीच, उत्तराखण्डका मुख्यमन्त्री पुष्कर सिंह धामी र मध्य प्रदेशका मुख्यमन्त्री शिवराज सिंह चौहान आज देहरादूनबाट दुर्घटनास्थलतर्फ प्रस्थान गर्ने भएका छन् । शिवराज सिंह चौहान हिजो राति मात्र देहरादून पुगेका छन् र स्थितिको निगरानी गरिरहेका छन् । उनले मृतकका परिवारलाई पाँच लाख र घाइतेलाई ५० हजार रुपैयाँ दिने घोषणा गरेका छन् ।
