काठमाडौंः स्थानीय तहको निर्वाचनको नतिजा सार्वजनिक हुनेक्रम जारी छ । पछिल्लो विवरण अनुसार, नेपाली कांग्रेसले यस चुनावमा ३०१ वटा स्थानीय निकायमा प्रमुख वा अध्यक्ष पदमा विजय हासिल गरेर पहिलाे दल बनेको छ ।
नेपाली कांग्रेस अझै २३ स्थानीय तहमा अग्रस्थानमा रहेको छ । उपमेयर वा उपाध्यक्ष तर्फ पनि नेपाली कांग्रेसले २७६ स्थान जितेर अग्रस्थान बनाएको छ ।
दोस्रो स्थानमा रहेको नेकपा एमालेले शुक्रबार साँझसम्ममा १८५ स्थानमा विजयी भएको छ, र एमालेका १७ जनाले अझै अग्रस्थान बनाइरहेका छन् । उपमेयर वा उपाध्यक्ष पदमा पनि २१० जनाले विजय हासिल गरेका छन् भने २७ जनाले अग्रस्थान बनाइरहेका छन् ।
देशभर राम्रै नतिजा प्राप्त गरिरहेको भपनि नेकपा एमालेले कुनै पनि महानगरमा विजय वा अग्रता बनाउन सकेको छैन । एमालेका उम्मेदवारहरु सबै महानगरमा पछि छन् ।
यसअघि २०७४ को स्थानीय चुनावमा नेकपा एमालेले २९४ स्थानमा विजय हासिल गरेर पहिलो पार्टी बनेको थियो । नेपाली कांग्रेसले भने २६६ स्थान मात्र जितेको थियो । माओवादी केन्द्रले १०६ स्थान जितेको थियो तर यस पटक माओवादीले ११५ स्थान जितिसकेको छ । संघीय फोरमले ३०, राजपाले २५, फोरम लोकतान्त्रिकले ५ र अन्यले २३ स्थान जितेका थिए ।
त्यस्तै, चुनाव अघि कम आंकिएको नेकपा (माओवादी केन्द्र) र माधव कुमार नेपालले नेतृत्व गरेको नेकपा (एकीकृत समाजवादी) ले आम अपेक्षाभन्दा फरक नतिजा ल्याएका छन् ।
माओवादी केन्द्रले ११७ जना प्रमुख वा अध्यक्ष जितेको छ भने ६ स्थानमा अझै अग्रता बनाइरहेको छ । माओवादीका १२० जनाले उपप्रमुख वा उपाध्यक्ष पदमा विजय हासिल गरेका छन् भने अझै ९ जनाले अग्रता बनाइरहेका छन् ।
नेकपा एस ले १५ स्थानमा प्रमुख वा अध्यक्ष पद जितेको छ भने ४ स्थानमा अग्रता कायम गरिरहेको छ । यस दलका तर्फबाट पोखरा महानगरपालिकामा धनराज आचार्यले अग्रता बनाइरहेका छन् भने हेटौंडा उपमहानगरपालिकामा मीना कुमारी लामाले प्रमुखमा विजयी भएकी छिन् ।
टुटफुटको राजनीति व्यहोरेको उपेन्द्र यादव नेतृत्वको जनता समाजवादीले पनि हालसम्म २३ वटा स्थानीय निकायका प्रमुख वा अध्यक्ष पदमा विजय हासिल गरेको छ । जसपाका अझै १० जना उम्मेदवारले मतगणना जारी रहेका स्थानीय निकायमा अग्रता बनाइरहेका छन् । जसपाले २५ स्थानमा उपमेयर वा उपाध्यक्ष जितिसकेको छ भने ६ पालिकामा अग्रता कायम राखेको छ ।
महन्थ ठाकुरले नेतृत्व गरिरहेको लोकतान्त्रिक समाजवादी पार्टी नेपालले १० वटा पालिकामा प्रमुख वा अध्यक्ष पद जितेको छ भने ६ वटामा अग्रता बनाइरहेको छ । यस दलले ९ जना उपमेयर वा उपाध्यक्ष जितिसकेको छ ।
राप्रपा, जनमोर्चा समेतका अन्य दल एवं स्वतन्त्र उम्मेदवारहरुले २६ वटा स्थानीय तहमा प्रमुख वा अध्यक्ष पद जितिसकेका छन् भने ६ जनाले अग्रता लिइरहेका छन् । जसमा काठमाडौंंमा वालेन्द्र साह, धरानमा हर्कराज राई र धनगढीमा गोपाल हमाल चर्चित छन् । मतगणनाको प्रवृत्ति हेर्दा यी तीनै उम्मेदवारले विजय हासिल गर्ने सम्भावना छ ।
अर्कातर्फ राप्रपा, कांग्रेस र माओवादीको गठबन्धनले झापाको दमक नगरपालिकामा विजय हासिल गरेर नेकपा एमालेका अध्यक्ष केपी शर्मा ओलीमाथि दबाब बढाएका छन् । यस पालिकाको प्रमुखमा राप्रपाका राम कुमार थापा विजयी भएका छन् भने उपप्रमुखमा पनि नेपाली कांग्रेसकी रेगिना भट्टराई विजयी भएका छन् ।
पछिल्लो समय निर्वाचन आयोगले जनशक्ति बढाएर मतगणना गरिरहेको भए पनि मतगणनाको अन्तिम नतिजा प्राप्त हुन केही दिन लाग्ने अनुमान गरिएको छ ।
