गलकोट । बागलुङ जिल्लाको सदरमुकाममा रहेको विद्यामन्दिर बालविकास केन्द्रका विद्यार्थीलाई निःशुल्क खाजा खुवाउने अभियान शुरु गरेपछि केन्द्रमा अध्ययन गर्न आउने विपन्न परिवारका विद्यार्थीको सङ्ख्यामा वृद्धि हुन थालेको छ ।
बाह्रजना विद्यार्थी रहेको बालविकास केन्द्रमा पूर्व विद्यार्थीको पहलमा निःशुल्क खाजा खुवाउने अभियान शुरु भएपछि विद्यार्थीको सङ्ख्यामा वृद्धि भएर ३० पगेको बालविकास केन्द्रले जनाएको छ ।
जिल्ला सदरमुकाममा बसोवास गदै आएका मजदूर, ठेला व्यापारी, मुस्लिम अभिभावकका अधिकांश विद्यार्थीले अध्ययन गर्ने केन्द्रमा निःशुल्क खाजा वितरण हुन थालेपछि विपन्न विद्यार्थीको आकर्षण बढेको हो । जिल्ला सदरमुकाममा रहेका महङ्गा मन्टेश्वरी तथा बोर्डिङ स्कुलमा पठाउन नसक्ने अभिभावक आफ्ना छोराछोरीलाई निःशुल्क खाजा सहितको शिक्षा प्रदान गरेकोमा विद्यालयप्रति आभारी भएका छन् ।
‘विपन्न परिवारका छोराछोरी जसले खाजा ल्याएर विद्यालय आउन सक्दैनन् उनैलाई लक्षित गरी यस्तो अभियान ल्याएका हौँ’ निःशुल्क खाजा खुवाउने अभियानका आर्थिक संयोजक तथा पूर्व विद्यार्थी मुकेशचन्द्र राजभण्डारीले भन्नुभयो, “भोको पेटमा अध्ययन गर्दा शैक्षिक गुणस्तर वृद्धि गर्न सकिँदैन भन्ने सोचका साथ निःशुल्क खाजा अभियान शुरु गरेका हौँ ।”
विद्यालयमा अध्ययन गरी हाल स्वदेश तथा विदेशमा ख्याति प्राप्त पूर्व विद्यार्थी तथा शिक्षा प्रेमीबाट सहयोग सङ्कलन गरी निःशुल्क खाजा वितरण गदै आएको राजभण्डारीले बताउनुभयो ।
बालविकास केन्द्रमा अध्ययनरत् ३० विद्यार्थीलाई दिनको एक पटक घरेलु खाजा प्रदान गरिँदै आएको केन्द्रका सहजकर्ता जमुना क्षेत्रीले बताउनुभयो । खाजा वितरणको एक हप्ते सूचीनै तयार पारीे अण्डा, चना, दूध र लिटो मिलाएर खुवाउने गरेको केन्द्रले बताएको छ ।
यो वर्ष मात्र बालविकास केन्द्रको भौतिक सुधार, पोशाक, जुत्ता तथा झोलाका लागि विद्यालय तथा अन्य व्यक्तिको सहयोगबाट रु ६ लाख बराबरको रकम खर्च गर्ने योजना रहेको विद्यालय व्यवस्थापन समितिका अध्यक्ष सुवासचन्द्र राजभण्डारीले जानकारी दिनुभयो ।
बालविकास केन्द्रलाई पूर्व विद्यार्थी तथा शिक्षा प्रेमी सहयोगीले आफ्नो तथा परिवारको जन्मदिन, वैवाहिक वार्षिकोत्सव तथा पितृहरुको सम्झनामा आर्थिक सहयोग गर्ने गरेका छन् । स्वतःस्फूर्तरूपमा हस्तान्तरण भएको आर्थिक सहयोगबाटै बालविकास केन्द्रका विद्यार्थीलाई निःशुल्क खाजा वितरण गरिँदै आएको विद्यालयले जनाएको छ । केन्द्रमा एकजना सरकारी दरबन्दी तथा एकजना स्थानीय स्रोतबाट गरी दुईजना सहजकर्ता रहेका छन् ।
केन्द्रका विद्यार्थीलाई निःशुल्क खाजा खुवाउँदा एक महीनाको रु २३ हजार ५०० खर्च लाग्ने राजभण्डारीले बताउनुभयो । निःशुल्क खाजा वितरणको शुभारम्भ गत असोज ८ गते विद्यालयका पूर्व विद्यार्थी तथा पूर्व प्रधानन्यायधीश कल्याण श्रेष्ठले गर्नुभएको थियो । रासस
