काठमाडौं । नेपाली कम्युनिष्ट पार्टीकी सांसद पार्वती विकले प्राकृतिक विपद्को सामना गर्न राजनीतिक आग्रह–पूर्वाग्रहभन्दा माथि उठेर राष्ट्रिय एकताका साथ उद्धार तथा राहत कार्यमा जुट्न सरकार र सरोकारवाला पक्षलाई आग्रह गर्नुभएको छ ।
बुधबार बसेको प्रतिनिधिसभाको बैठकमा विशेष समय लिएर बोल्दै सांसद विकले अविरल वर्षाका कारण रसुवा, धादिङ, चितवनलगायत जिल्लामा भएको मानवीय तथा भौतिक क्षतिप्रति दुःख व्यक्त गर्दै प्रभावित नागरिकको उद्धार र राहतलाई पहिलो प्राथमिकतामा राख्न सरकारको ध्यानाकर्षण गराउनुभयो ।
उहाँले विपद्का कारण हजारौँ नागरिक बेपत्ता भएको, लाखौँ प्रभावित भएको र अर्बौँ रुपैयाँ बराबरको क्षति भएको उल्लेख गर्दै प्रभावित क्षेत्रमा जनजीवन सामान्य बनाउन सरकारले तत्काल प्रभावकारी कदम चाल्नुपर्ने बताउनुभयो । आवश्यक परे सांसदहरूलाई समेत उद्धार तथा राहत कार्यमा परिचालन गर्न उहाँले आग्रह गर्नुभयो ।
सांसद विकले विगतमा जाजरकोटमा बाढीपहिरोबाट विस्थापित भएका परिवारले अझै उचित व्यवस्थापन पाउन नसकेको स्मरण गर्दै वर्तमान विपद्का पीडितले पनि त्यस्तै नियति भोग्न नपरोस् भन्नेतर्फ सरकार गम्भीर हुनुपर्ने बताउनुभयो ।
उद्धार र राहतमा सरकारको मात्र प्रयास पर्याप्त नहुने भन्दै उहाँले निजी क्षेत्रलाई समेत तत्काल परिचालन गर्न सुझाव दिनुभयो । साथै, विगतका विपद्मा सहयोग गरेका स्वदेशी तथा विदेशी सहयोगी निकायलाई पुनः सक्रिय भएर सहयोगमा जुट्न उहाँले अपिल गर्नुभयो ।
विपद्को संवेदनशील समयमा सामाजिक सञ्जालमार्फत त्रास र भ्रम फैलाउने गतिविधि भइरहेको भन्दै सांसद विकले तथ्यपूर्ण र जिम्मेवार सूचना मात्र सम्प्रेषण गर्न आग्रह गर्नुभयो । नकारात्मक तथा भयावह सन्देशले नागरिकमा थप त्रास र निराशा पैदा गर्ने उहाँको भनाइ थियो ।
उहाँले भन्नुभयो, ‘अहिलेको अवस्थामा नागरिकको जिउधनको सुरक्षा हाम्रो पहिलो प्राथमिकता हुनुपर्छ। सरकारले हामी सांसदहरूलाई पनि कुन रूपमा र कसरी परिचालन गर्न सक्छ, त्यसका लागि हामी तयार छौँ । हामीलाई पनि उद्धार कार्यमा खटाइयोस् ।’
सांसद विकले प्राकृतिक विपद्बाट पीडित नागरिकको घाउमा मलम लगाउने गरी मानवीय भावनाका साथ अघि बढ्न र नागरिकलाई हतोत्साहित बनाउने गतिविधि नगर्न सबै पक्षलाई आग्रह गर्नुभयो ।
