काठमाडौं । निर्मल निवासको नाङ्गो हस्तक्षेपका कारण आफू पराजित भएको भन्दै राप्रपाका पूर्वअध्यक्ष कमल थापाले सामाजिक सञ्जालमार्फत आक्रोश पोखेपछि थापाको चर्को आलोचना भयो । पार्टी कार्यालयमा पदभार ग्रहण गर्दै नवनिर्वाचित अध्यक्ष राजेन्द्र लिङ्देनले भने थापाको अभिव्यक्तिलाई दुर्भाग्यपूर्ण कुरा भएको बताउनुभयो । उहाँले भन्नुभयो, ‘यो एकदमै दुर्भाग्यपूर्ण कुरा हो । यसले महाधिवेशन प्रतिनिधिहरूप्रति अविश्वास भएको छ । उहाँहरूले गरेको निर्णयको अपमान भएको छ ।’
पूर्वराजा शाहका सम्वाद सचिव फणीराज पाठकले पनि थापाको टिप्पणीप्रति असन्तुष्टि जनाउनु भएको छ । न्यूजपोलारसँग पाठकले भन्नुभयो, ‘राजाको चासो देश र जनताप्रति छ। कुनै पार्टी र त्यसका नेताप्रति कुनै चासो छैन र हस्तक्षेप पनि हुँदैन। अरु बेला राजाको गुणगान गाउने अनि हारेपछि चाहिँ आरोप लगाउन मिल्छ ?’ पाठकले भन्नुभयो, ‘बरु पछिल्लो समय राजनीतिक दललाई नै राजाको आवश्यक्ता परेको महसुस हुन थालेको छ। कुनै दलका शिर्ष नेतालाई होला, कुनै दलका तल्लो तहका नेता र कार्यकर्तालाई होला। तर, देशमा राजाको आवश्यक्ता रहेको अधिकांश पार्टीहरुमा स्वीकार हुन थालेको विषय हो।’
निर्वानमा पराजित भएलगत्तै थापाले ट्वीटरमा पूर्वराजा शाहलाई मेन्सन गर्दै पोष्ट गर्नुभएको थियो । ‘प्रतिकूल परिस्थितिमा समेत हामीमाथि विश्वास र भरोसा गर्ने पार्टीका सम्पूर्ण साथीहरुमा आभारी छु। पार्टीको आन्तरिक प्रतिस्पर्धामा निर्मल निवासको नाङ्गो हस्तक्षेपको भत्सर्ना गर्दछु ।’ सम्वाद सचिव पाठकका अनुसार पूर्वराजाले कुनै पनि सामाजिक सञ्जाल चलाउनुहुन्न र उहाँको नाममा एकाउन्ट पनि छैन ।
