काठमाडौं । नेपाली राष्ट्रिय फुटबल टिमका गोलकिपर किरण चेम्जोङ भारतीय क्लब मिनर्वा पञ्जाबमा अनुबन्धित भएका छन् ।
आइलिग क्लब पन्जाबले बुधबार सामाजिक सञ्जाल फेसबुकमार्फत किरणलाई अनुबन्ध गरेको जनाएको छ । यसअघि पनि किरणले पञ्जाबबाट खेल्दै आइलिग जिताएका थिए । किरणले २०१७–०१८ को सिजन पञ्जाबबाट खेलेका थिए ।
यो सिजनको लागि माल्दिभ्सको टिसी स्पोर्ट्स क्लबमा किरणले आफ्नो अनुबन्धन नवीकरण गरेका थिए । तर, नेपाली फुटबल टिमको मैत्रीपूर्ण खेल मलेसिया र चाइनिज ताइपेसँग भएपछि किरणले खेल्नैपर्ने भएको थियो । नेपाली टीमको मैत्रीपूर्ण खेललाई मुख्य प्राथमिकतामा राख्दा किरणले माल्दिभ्सबाट व्यवसायिक फुटबल खेल्ने मौका गुमाए । यो सिजनको लागि किरण र क्लबबीच लिखित सम्झौता भइसकेको थियो ।
यसअघि किरणले टिसी स्पोर्टस्सँग चार बर्षको नयाँ सम्झौता गरेका थिए । गत सिजन क्लबलाई धिवेही प्रिमियर लिगको उपाधि जिताउन अहम भूमिका खेलेका किरणले लिगको उत्कृष्ट गोलरक्षकको पुरस्कार समेत जितेका थिए ।
उता, टिसी स्पोर्ट्स क्लबको पनि त्यही समयमा खेल जुधेपछि किरण र क्लबबीचको सम्झौता तोडिएको थियो । त्यसयता, उनी कुनै क्लबमा अनुबन्धित भएका थिएनन् ।
माल्दिभ्समा आउँदो जुन महिनादेखि नयाँ सिजन शुरु हुँदैछ ।
