काठमाडौं । संस्कृति, पर्यटन तथा नागरिक उड्डयनमन्त्री खडकराज पौडेलले नेपाल वायुसेवा निगमको वित्तीय दायित्व व्यवस्थापनका लागि ऋणको ब्याजदर पुनरावलोकन गर्ने विषयमा सरकारले परामर्श अघि बढाएको बताउनुभएको छ ।
सोमबार प्रतिनिधिसभाअन्तर्गतको अन्तर्राष्ट्रिय सम्बन्ध तथा पर्यटन समितिको बैठकमा बोल्दै मन्त्री पौडेलले कर्मचारी सञ्चय कोष र नागरिक लगानी कोषबाट निगमले लिएको ऋणको ब्याजदर तथा किस्ता भुक्तानीलाई व्यावहारिक बनाउने विषयमा सरकारका तर्फबाट पहल भइरहेको जानकारी दिनुभयो ।
उहाँले निगमको करिब ५० देखि ५६ अर्ब रुपैयाँ बराबरको दायित्व राष्ट्रिय ध्वजावाहकजस्तो ठूलो ब्रान्ड र सम्पत्ति भएको संस्थाका लागि धान्नै नसकिने अवस्था नभएको दाबी गर्नुभयो । निगमले लिएको ऋणलाई व्यवस्थापन गर्न सकिने भन्दै ब्याजदरमा केही सहजीकरण गर्न सके नगद प्रवाह सहज हुने उहाँको भनाइ थियो ।
मन्त्री पौडेलले भन्नुभयो, ‘नेपाल वायुसेवा निगम नाफामुखी संस्था होइन, तर यसलाई वित्तीय रूपमा सक्षम र व्यवस्थित बनाउन आवश्यक छ । निगमको मुख्य समस्या अहिलेको ऋण तथा ब्याजदर व्यवस्थापनसँग सम्बन्धित छ ।’
कर्मचारी सञ्चय कोष र नागरिक लगानी कोषमा सर्वसाधारण तथा कर्मचारीको बचत रकम रहेकाले उनीहरूको लगानी जोखिममा नपर्ने गरी ऋण व्यवस्थापनको सन्तुलित उपाय खोज्नुपर्ने दायित्व सरकारको रहेको उहाँले बताउनुभयो ।
ब्याजदर पुनरावलोकन र ऋण पुनर्संरचनाका विषयमा प्रधानमन्त्री तथा अर्थमन्त्रीसँग समेत छलफल भइरहेको जानकारी दिँदै मन्त्री पौडेलले अर्थमन्त्री स्वदेश फर्किएपछि ठोस वित्तीय कार्ययोजना बनाउन थप छलफल गरिने बताउनुभयो ।
निगमलाई तत्काल नयाँ जहाज खरिद गर्न आर्थिक स्रोत अपुग भए लिजमा जहाज ल्याएर सञ्चालन गर्न सकिने उहाँले बताउनुभयो । साथै, मौजुदा जहाजको उडान तालिका वैज्ञानिक ढंगले व्यवस्थापन गरेर आम्दानी बढाउन सकिने विकल्प पनि रहेको उहाँको भनाइ थियो ।
राष्ट्रिय दायित्व बोकेको सार्वजनिक संस्थाका रूपमा निगमलाई वित्तीय संकटबाट बाहिर ल्याउन अन्तरमन्त्रालय समन्वयलाई तीव्र बनाइएको मन्त्री पौडेलले समितिलाई जानकारी गराउनुभयो।
