काठमाडौँ । कानून, न्याय तथा संसदीय मामिलामन्त्री सोविता गौतमले नेपालमा लगानीको वातावरण सुधार गर्न कानुनी तथा प्रक्रियागत सुधार आवश्यक रहेको बताउनुभएको छ।
नेपाल पूर्वाधार सम्मेलनको तयारीअन्तर्गत आयोजित ‘लगानी र विकासका लागि कानून सुधार’ सम्बन्धी तीनदिने कार्यशाला गोष्ठीमा बोल्दै मन्त्री गौतमले लगानी भित्र्याउन प्रक्रियागत झन्झट हटाउनुपर्ने बताउनुभएको हो।
उहाँले ‘नेपालमा लगानी गरौँ’ भनेर ठूला कार्यक्रम आयोजना गरे पनि लगानी प्रक्रिया नै बाधक बने लगानीकर्ता आकर्षित हुन नसक्ने बताउनुभयो। लामो समयसम्म सहज वातावरण नपाउँदा स्वदेशी लगानीकर्ता समेत निरुत्साहित हुन सक्ने भन्दै उहाँले लगानी प्रक्रिया सहज, पारदर्शी र सबैका लागि अनुकूल बनाउनुपर्नेमा जोड दिनुभयो।
नेपालको विकासमा निजी क्षेत्रलाई प्रभावकारी रूपमा समेट्ने र लगानीको वातावरण सहज बनाउने विषयमा सरकार स्पष्ट रहेको मन्त्री गौतमको भनाइ थियो।
उहाँले आगामी विकासका लागि आवश्यक पूर्वाधार तय गर्न सरकारले स्पष्ट नीति लिएको उल्लेख गर्दै त्यसको आधारभूत पूर्वाधारका रूपमा कानून निर्माणलाई लिएको बताउनुभयो। कानून मन्त्रालयले चालु वर्षलाई ‘कानून सुधार तथा निर्माण वर्ष’ का रूपमा अघि बढाएको जानकारी दिँदै उहाँले आवश्यक कानून पहिचान गरी संशोधनको काम अघि बढाइएको बताउनुभयो।
मन्त्री गौतमका अनुसार पछिल्लो समय करिब ४६ वटा विधेयक संघीय संसद्मा दर्ता भएका छन्। तीमध्ये केही संसदीय समितिमा पुगेका छन् भने केहीमाथि छलफल भइरहेको छ। सरकारले अध्यादेशमार्फत समेत आवश्यक काम अघि बढाएको उहाँले जानकारी दिनुभयो।
अब केही समय संसद्को अधिवेशन नहुने भएकाले उक्त अवधिलाई आगामी अधिवेशनमा आवश्यक पर्ने कानून निर्माणको आधार तय गर्ने अवसरका रूपमा उपयोग गरिने उहाँले बताउनुभयो।
विभिन्न क्षेत्रबाट पहिचान गरिएका विषयलाई दस्तावेजीकरण गरी त्यसैका आधारमा आगामी दिनमा कानून निर्माण तथा संशोधनको प्रक्रिया अघि बढाइने मन्त्री गौतमले स्पष्ट पार्नुभयो।
