पोखरा । पोखरा महानगरपालिकाले फेवातालको सुन्दरता र वातावरणीय सन्तुलन कायम गर्ने उद्देश्यसहित फिर्के खोला अतिक्रमण हटाउने अभियानलाई तीव्रता दिएको छ।
असोज १५ गतेदेखि सुरु भएको अभियानअन्तर्गत हालसम्म खोलाको मापदण्ड मिचेर निर्माण गरिएका २६ वटा पक्की संरचना हटाइएको महानगरपालिकाले जनाएको छ। महानगरले अवैध संरचना हटाउनेसँगै खोलाका दुवै किनारमा करिडोर (ट्र्याक) निर्माणको कामसमेत समानान्तर रूपमा अघि बढाएको छ।
करिडोर निर्माणपछि भविष्यमा उक्त क्षेत्रमा व्यवस्थित सडक सञ्जाल तथा ढल निकासको व्यवस्था गर्न सहज हुने महानगरको अपेक्षा छ।
अभियानका क्रममा फिर्के खोला अतिक्रमण प्रकरणमा जोडिएका पूर्वमाओवादी नेता ज्ञानबहादुर कोईरालाको पाँचतले पक्की भवनसमेत भत्काइएको छ। आफ्नो संरचना हटाइने विषयमा आफू पहिले नै जानकार रहेको बताउँदै कोईरालाले तत्कालीन समयमा आवेगमा आएर गल्ती गरेको स्वीकार गरेका छन्।
महानगरपालिकाले प्रभावशाली व्यक्तिको संरचना भए पनि अतिक्रमण हटाउने अभियानलाई निरन्तरता दिएपछि फिर्के खोला व्यवस्थापनको विषय थप चर्चामा आएको छ।
स्थानीय बासिन्दाले भने अभियानप्रति मिश्रित प्रतिक्रिया दिएका छन्। अतिक्रमण हटाउने कामको अधिकांशले स्वागत गरे पनि अभियान संरचना भत्काउने कार्यमा मात्रै सीमित हुने हो कि खोलाको दीर्घकालीन व्यवस्थापन, सरसफाइ तथा सौन्दर्यीकरणलाई पनि निरन्तरता दिइने हो भन्नेमा उनीहरूले चासो व्यक्त गरेका छन्।
महानगरपालिकाले भने फिर्के खोला अतिक्रमण हटाउने अभियानलाई खोलाको दीर्घकालीन स्वच्छता, वातावरणीय संरक्षण र व्यवस्थित शहर निर्माणको महत्वपूर्ण हिस्साका रूपमा अघि बढाइएको जनाएको छ।
