काठमाडौं । पूर्वाधार विकासमन्त्री सुनिल लम्सालले विद्यमान कानूनमा सुधार गर्दै विकास र लगानीका लागि अनुकूल वातावरण निर्माण गर्न सरकार केन्द्रित रहेको बताउनुभएको छ ।
शुक्रबार पूर्वाधार विकास मन्त्रालयले आयोजना गरेको ‘नेपाल पूर्वाधार सम्मेलन २०२६ सम्बन्धी लगानी र विकासका लागि कानूनी सुधार’ विषयक कार्यशाला गोष्ठीलाई सम्बोधन गर्दै मन्त्री लम्सालले कानूनअनुसार राज्यको प्रणाली सञ्चालन हुनुका साथै त्यसको परिणामसमेत देखिने गरी कानूनी सुधार अघि बढाइरहेको बताउनुभयो ।
उहाँले नागरिकमैत्री कानून निर्माणलाई सरकारले प्राथमिकतामा राखेको उल्लेख गर्दै ऐन देशको ऐना भएकाले जस्तो ऐन निर्माण गरिन्छ, त्यसअनुसार नै राष्ट्रको अवस्था बन्ने धारणा राख्नुभयो ।
मन्त्री लम्सालले सार्वजनिक खरिद ऐन संशोधनका क्रममा सरोकारवाला निकायबाट प्राप्त सुझावको सरकारले अध्ययन गरे पनि कतिपय सुझावले नीतिगत आवश्यकता पूरा नगर्ने भएकाले समेट्न नसकिएको स्पष्ट पार्नुभयो । उहाँले पूर्वाधार निर्माणलाई थप गतिशील र प्रभावकारी बनाउन आवश्यक कानूनी सुधारका विषयमा गोष्ठीबाट महत्वपूर्ण सुझाव प्राप्त हुने अपेक्षा व्यक्त गर्नुभयो ।
सरकारले विचौलियाले लाभ लिने गरी कानून निर्माण नगर्ने उहाँले स्पष्ट पार्नुभयो । सरकारले सार्वजनिक केन्द्रित नीतिगत परिवर्तन खोजेको भन्दै मन्त्री लम्सालले कानून निर्माणमा व्यापक अध्ययन र सरोकारवालाको सुझावलाई समेट्दै उत्कृष्ट कानूनी व्यवस्था निर्माण गर्नुपर्नेमा जोड दिनुभयो ।
उहाँले कानून निर्माणका क्रममा ‘गर्न सक्नेछ’ जस्ता अस्पष्ट र वैकल्पिक अर्थ लाग्ने शब्दावली नराखिने पनि स्पष्ट पार्नुभयो । उहाँका अनुसार कानून कार्यान्वयनमा स्पष्टता र परिणाम देखिने गरी आवश्यक सुधार गरिनेछ ।
