काठमाडौं । परराष्ट्रमन्त्री शिशिर खनालले प्रधानमन्त्रीको भारत भ्रमणका लागि औपचारिक मिति तय नभए पनि उपयुक्त समयमा भ्रमण हुने बताएका छन्।
संयुक्त राष्ट्रसंघको महासभामा सहभागी भएर बुधबार स्वदेश फर्किएका मन्त्री खनालले त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै प्रधानमन्त्रीको भारत भ्रमणलाई फलदायी र उपलब्धिमूलक बनाउने तयारी भइरहेको जानकारी दिए।
उनका अनुसार नयाँ सरकार गठन भएलगत्तै भारतले प्रधानमन्त्रीलाई औपचारिक भ्रमणको निम्तो दिएको थियो। सरकारले उक्त निम्तोलाई सकारात्मक रूपमा लिँदै उपयुक्त समय मिलाएर भ्रमण गर्ने तयारी अघि बढाएको उनले बताए।
‘सरकार बन्नासाथ सम्माननीय प्रधानमन्त्रीज्यूलाई निम्तो आएको थियो र त्यसलाई हामीले सकारात्मक रूपमा लिएका थियौं,’ मन्त्री खनालले भने, ‘उपयुक्त अवसर पारेर एउटा परिणाममुखी भ्रमण गर्ने हाम्रो तयारी छ।’
भारत भ्रमणको मिति भने अहिलेसम्म निश्चित नभएको उनले स्पष्ट पारे। भ्रमणको समयभन्दा पनि त्यसबाट ठोस उपलब्धि हासिल गर्ने विषयमा दुवै पक्षको जोड रहेको उनको भनाइ थियो।
‘आजको अवस्थासम्म कहिले हुन्छ भन्ने यकिन छैन। तर भ्रमण सकेसम्म फलदायी र परिणाममुखी होस् भन्नेमा दुवै पक्षको अपेक्षा र चाहना छ,’ उनले भने।
