बागलुङ । अविरल वर्षासँगै आएको पहिरोमा परी बागलुङका विभिन्न स्थानमा १० जनाको मृत्यु भएको छ भने एक जना बेपत्ता भएका छन् ।
असोज १० र ११ गते परेको अविरल वर्षाका कारण तमानखोला, निसीखोला र ताराखोला गाउँपालिकालगायतका क्षेत्रमा पहिरो जाँदा घर पुरिएर उनीहरूको मृत्यु भएको हो ।
तमानखोला गाउँपालिका–४ सन्तरमा पहिरोले घर पुरिँदा ६५ वर्षीया उदिसरा विक र ५० वर्षीय हस्तवीर विकको मृत्यु भएको छ । सोही घटनामा ५२ वर्षीया पुनसरा विक बेपत्ता रहेको प्रहरीले जनाएको छ ।
यस्तै, तमानखोला गाउँपालिका–३ धनारकुकमा पहिरोमा परी ८० वर्षीय बुद्धिराज घर्ती र ६६ वर्षीया भीमदेवी घर्तीको मृत्यु भएको छ । निसीखोला गाउँपालिका–६ सेलवाङका ५० वर्षीय सूर्यबहादुर घर्तीको पनि पहिरोमा परी मृत्यु भएको छ ।
निसीखोला गाउँपालिका–३ कन्केखरियामा पहिरोले घर पुरिँदा एकै परिवारका चार जनाको मृत्यु भएको छ । मृत्यु हुनेमा ३६ वर्षीया श्यामकुमारी विक, १३ वर्षीय मनोज विक, ८ वर्षीय मुकेश विक र ३ वर्षीय निशान विक रहेका छन् ।
यसैगरी, ताराखोला गाउँपालिका–५ धरममरका ५९ वर्षीय मनबहादुर रोक्काको पनि पहिरोमा परी मृत्यु भएको छ ।
अविरल वर्षासँगै आएको पहिरोका कारण जिल्लाका विभिन्न स्थानमा घर तथा अन्य भौतिक संरचनामा समेत क्षति पुगेको छ । प्रभावित क्षेत्रमा विभिन्न निकायसँगको समन्वयमा उद्धार तथा खोजी कार्य जारी रहेको प्रहरीले जनाएको छ ।
घटनाबारे थप विवरण संकलन तथा अनुसन्धान भइरहेको छ।
