काठमाडौं ।पूर्व प्रधानन्यायाधीश चोलेन्द्रशमशेर राणाले आफ्नो तथा परिवारको सुरक्षामा गम्भीर चुनौती देखिएको भन्दै थप सुरक्षा व्यवस्था गर्न प्रहरीसँग माग गर्नुभएको छ ।
राणाका तर्फबाट उनका छोरा सचिन्द्र शमशेर जबराले काठमाडौं उपत्यका प्रहरी कार्यालय, रानीपोखरीमा निवेदन दिँदै आवश्यक शान्ति सुरक्षाको व्यवस्था गर्न माग गरेका हुन्।
निवेदनमा पछिल्लो समय देशको अवस्था, सामाजिक सञ्जाल तथा विभिन्न सञ्चारमाध्यममा आएका शान्ति सुरक्षासम्बन्धी विषयका कारण आफ्नो परिवारको सुरक्षामा चुनौती महसुस भएको उल्लेख गरिएको छ।
राणाले विगतमा राज्यका विभिन्न अंगमा निर्वाह गरेको जिम्मेवारी तथा न्यायपालिकाको प्रमुखको हैसियतमा गरेका न्यायिक निर्णयका कारण आफू थप असुरक्षित महसुस गरिरहेको निवेदनमा उल्लेख छ।
‘मैले कतिपय कुराहरू हालको मितिमा यस कार्यालयमा आइसकेपछि पनि जानकारी पाएँ,’ निवेदनमा भनिएको छ, ‘यस कारण मलाई थप सुरक्षा थप गरी पाउन यो निवेदन पेश गरेको छु।’
आफ्नो सम्पूर्ण विवरण राज्यका सुरक्षा निकायलाई जानकारी नै रहेको उल्लेख गर्दै राणाले आफ्नो निवास, परिवार तथा निजको ज्यानको सुरक्षामा राज्यको सम्पूर्ण ध्यान पुग्नुपर्ने माग गरेका छन्।
