काठमाडौं । नेपाली र रुसी पत्रकारबीच सहकार्य, अनुभव आदानप्रदान तथा व्यावसायिक क्षमता अभिवृद्धि गर्ने उद्देश्यले जर्नलिस्ट फर जस्टिस नेपाल (जेजेएन) र रसियन युनियन अफ जर्नलिस्ट (आरयूजे) बीच समझदारीपत्रमा हस्ताक्षर भएको छ।
सेप्टेम्बर २३ मा रुसको राजधानी मस्कोमा आयोजित कार्यक्रममा आरयूजेका अध्यक्ष भ्लादिमिर सोलोभ्योभ र जेजेएनका अध्यक्ष टीकाराम खड्काले समझदारीपत्रमा हस्ताक्षर गर्नुभएको हो।
समझदारीपत्रमा हस्ताक्षरपछि आरयूजेका अध्यक्ष सोलोभ्योभले दुई संस्थाबीचको सहकार्यले नेपाल र रुसका पत्रकारबीच सहकार्य र अनुभव आदानप्रदानसँगै पत्रकारहरूको व्यावसायिक क्षमता अभिवृद्धिमा योगदान पुग्ने बताउनुभयो।
जेजेएनका अध्यक्ष खड्काले समझदारीमार्फत पत्रकारहरूको व्यावसायिक सीप तथा क्षमता विकास, सेमिनार र द्विपक्षीय भ्रमणलाई सहजीकरण गर्नुका साथै पत्रकारिताका विभिन्न क्षेत्रमा सहकार्य अघि बढाउने उद्देश्य रहेको बताउनुभयो।
समझदारीअनुसार नेपाल र रुसका पत्रकार तथा दुवै संस्थाका प्रतिनिधिबीच प्रतिनिधिमण्डल आदानप्रदान गरिनेछ। त्यसैगरी व्यावसायिक अनुभव तथा पत्रकारिताका अभ्यास आदानप्रदान, प्रेस भ्रमण, संयुक्त सेमिनार तथा पत्रकार सम्मेलन आयोजना गर्ने र विभिन्न बैठक, कार्यक्रम तथा मञ्चमा आपसी सहभागिता जनाउने विषय समझदारीमा समेटिएको छ।
पत्रकारहरूको व्यावसायिक क्षमता अभिवृद्धिका लागि तालिम तथा व्यावसायिक विकाससम्बन्धी कार्यक्रम सञ्चालन गर्ने तथा पत्रकारिता अध्यापन गराउने विश्वविद्यालय र शैक्षिक संस्थाबीच सहकार्य तथा आदानप्रदानलाई प्रोत्साहन गर्ने व्यवस्था पनि समझदारीपत्रमा गरिएको छ।
जेजेएनका अनुसार दुई संस्थाबीच समझदारी कायम गराउन काठमाडौंस्थित रुसी दूतावासले आवश्यक समन्वय गरेको थियो। समझदारीपत्रमा हस्ताक्षरका लागि समन्वय तथा सहयोग गरेकोमा जेजेएनले रुसी दूतावासप्रति आभार व्यक्त गरेको छ।
