काठमाडौँ । भदौ १० गते भोटेकोशी नदीमा आएको विनाशकारी बाढीबाट प्रभावित क्षेत्रमा सरकारले आपत्कालीन स्वास्थ्य सेवा विस्तार गरेको छ ।
राष्ट्रिय सभाको बिहीबारको बैठकमा स्वास्थ्य तथा खाद्य स्वच्छतामन्त्री निशा मेहताले बाढी प्रभावित रसुवा, नुवाकोट र धादिङलगायतका क्षेत्रमा करिब ८ हजार ७ सय नागरिकलाई स्वास्थ्य सेवा प्रदान गरिएको जानकारी दिनुभयो ।
बाढीपछि सडक सम्पर्क विच्छेद भएका तथा दुर्गम क्षेत्रमा हेलिकप्टरमार्फत औषधि र स्वास्थ्य उपकरण ढुवानी गरिएको उहाँले बताउनुभयो । बाढीका कारण प्रभावित जिल्लाका चारवटा स्वास्थ्य संस्था पूर्ण रूपमा क्षतिग्रस्त भएको र अन्य स्वास्थ्य संस्थामा आंशिक क्षति पुगेको मन्त्री मेहताले जानकारी दिनुभयो । क्षतिग्रस्त क्षेत्रमा वैकल्पिक संरचना तथा टेन्टमार्फत स्वास्थ्य सेवा सञ्चालन भइरहेको उहाँले बताउनुभयो ।
मन्त्री मेहताका अनुसार अहिले ३४ वटा आकस्मिक चिकित्सा टोलीमार्फत करिब १५० स्वास्थ्यकर्मी प्रभावित क्षेत्रमा परिचालन भएका छन् । गर्भवती, सुत्केरी, बालबालिका, ज्येष्ठ नागरिक तथा अपाङ्गता भएका व्यक्तिको स्वास्थ्यलाई विशेष प्राथमिकतामा राखिएको छ । प्रसूति तथा बाल अस्पतालका विशेषज्ञ चिकित्सकको टोलीले प्रभावित क्षेत्रमा पुगेर मातृ तथा नवजात शिशुको स्वास्थ्य परीक्षण गरिरहेको उहाँले बताउनुभयो ।
दीर्घरोगीको उपचारमा अवरोध नहोस् भनेर नसर्ने रोगका औषधि निःशुल्क वितरण गरिएको छ । नुवाकोट र रसुवाका होल्डिङ सेन्टरमा रहेका बिरामीको नियमित स्वास्थ्य अनुगमन भइरहेको तथा क्षयरोग र एचआईभी संक्रमितको उपचारलाई निरन्तरता दिन औषधिको आपूर्ति सहज बनाइएको मन्त्रालयले जनाएको छ ।
मिर्गौला रोगीको डायलाइसिस सेवा प्रभावित हुन नदिन वैकल्पिक अस्पतालसँग समन्वय गरी सेवा व्यवस्थापन गरिएको मन्त्री मेहताले बताउनुभयो ।
त्यस्तै, बाढी प्रभावितको मानसिक स्वास्थ्यमा देखिन सक्ने समस्या सम्बोधन गर्न ९० जना मनोसामाजिक परामर्शदाता परिचालन गरिएको छ । हालसम्म करिब १२ हजार ९६९ पटक परामर्श सेवा प्रदान गरिएको र २४ घण्टा सञ्चालनमा रहेको ११६६ हेल्पलाइनमार्फत समेत सेवा दिइरहेको मन्त्रालयले जनाएको छ ।
मन्त्री मेहताले बाढी प्रभावित क्षेत्रमा महामारी फैलन नदिन तथा स्वास्थ्य सेवालाई थप प्रभावकारी बनाउन मन्त्रालय पूर्ण रूपमा सचेत रहेको बताउनुभयो ।
