काठमाडाैँ । धादिङमा निरन्तर वर्षा भइरहेकाले बाढी, पहिरो तथा डुबानको जोखिमलाई मध्यनजर गर्दै पृथ्वी राजमार्गमा रातिको समयमा सवारी आवागमन पूर्ण रूपमा बन्द गरिने भएको छ।
जिल्ला प्रशासन कार्यालय धादिङले बिहीबार सूचना जारी गर्दै आज (असोज ८) बेलुका ८ बजेदेखि असोज ९ गते बिहान ५ बजेसम्म पृथ्वी राजमार्ग भएर चल्ने सम्पूर्ण सवारीसाधनको आवागमनमा रोक लगाइएको जनाएको हो।
नेपाल मौसम विज्ञान विभागले आगामी केही दिनसम्म धादिङलगायत आसपासका क्षेत्रमा भारीदेखि अति भारी वर्षा हुन सक्ने पूर्वानुमान गरेपछि यात्रु तथा सवारीसाधनको सुरक्षा सुनिश्चित गर्न राजमार्ग बन्द गर्ने निर्णय गरिएको प्रमुख जिल्ला अधिकारी लक्ष्मी पाण्डेय (गौतम)ले जारी गरेको सूचनामा उल्लेख छ।
प्रशासनले यात्रु तथा सवारी चालकलाई मौसम र सडकको अवस्था बुझेर मात्र यात्रा गर्न, जोखिमयुक्त स्थानमा नजान तथा सम्बन्धित निकायले जारी गर्ने सुरक्षा निर्देशनको पूर्ण पालना गर्न आग्रह गरेको छ।
आपत्कालीन अवस्थामा नेपाल प्रहरीको १००, सशस्त्र प्रहरीको १११४, जिल्ला आपत्कालीन सञ्चालन केन्द्रको १२३४ वा ०१०-५२१४६४ मा सम्पर्क गर्न प्रशासनले अनुरोध गरेको छ।
