काठमाडौं । राष्ट्रिय स्वतन्त्र पार्टी (रास्वपा) का महामन्त्री एवं सांसद विपिन आचार्यले सरकारी संयन्त्रमा देखिएको सरुवा र बढुवाको अस्वस्थ अभ्यास अन्त्य गर्न तत्काल स्वायत्त सरुवा बोर्ड गठन गर्न सरकारसँग माग गर्नुभएको छ ।
बिहीवार बसेको प्रतिनिधि सभा बैठकमा बोल्दै सांसद आचार्यले नातागोता र निकट व्यक्तिहरूबाट हुने स्वार्थप्रेरित दबाब रोक्न निश्चित विधि र पूर्वानुमानका आधारमा काम गर्ने स्वायत्त सरुवा बोर्ड आवश्यक रहेको बताउनुभयो ।
उहाँले आफू राजनीतिमा आएपछि सबैभन्दा बढी दबाब सरुवा र बढुवाका लागि झेल्नुपरेको उल्लेख गर्दै सुशासन र पारदर्शिताको कुरा गर्नेहरू नै व्यक्तिगत स्वार्थका लागि शक्तिको केन्द्र धाउने गरेको बताउनुभयो ।
‘राजनीतिमा आएपछि मैले सबैभन्दा बढी झेलेको समस्या नै सरुवा र बढुवाको हो । सुशासनको कुरा गर्नेहरूसमेत मेरो घरमा नातावाद र कृपावाद खोज्दै आउनुहुन्छ,’ उहाँले भन्नुभयो ।
सांसद आचार्यले आफूले त्यस्ता आग्रहलाई विधि र पद्धतिभन्दा बाहिर गएर सम्बोधन गर्न नसक्ने भन्दै फर्काउने गरेको स्पष्ट पार्नुभयो ।
उहाँले रास्वपाको वाचापत्रमा समेत स्वायत्त सरुवा बोर्ड गठन गर्ने प्रतिबद्धता उल्लेख रहेको स्मरण गराउँदै सरकारले उक्त बोर्ड जतिसक्दो चाँडो गठन गर्नुपर्ने बताउनुभयो ।
‘हाम्रो वाचापत्रको बुँदा नम्बर ८ मा स्वायत्त सरुवा बोर्ड गठन गर्ने उल्लेख छ । जसले निश्चित विधि र पूर्वानुमानका आधारमा काम गर्छ । सरकारले यो बोर्ड जतिसक्दो चाँडो गठन गर्नुपर्छ,’ उहाँले भन्नुभयो ।
सरुवा–बढुवामा देखिएको दबाब र पहुँचको प्रवृत्तिप्रति कटाक्ष गर्दै उहाँले व्यवस्था परिवर्तन नभए आफूलाई आफ्नै इष्टमित्रबाट टीका र आशीर्वादभन्दा पनि काम नभएको भन्दै गाली र सराप पाउने अवस्था आउन सक्ने टिप्पणी गर्नुभयो ।
उहाँले भन्नुभयो, ‘यदि यो व्यवस्था नभए आउँदो दसैँमा आफ्नै इष्टमित्रबाट टीका र आशीर्वाद पाउनु त कता हो कता, काम भएन भनेर सराप पो पाइन्छ कि भन्ने डर छ । यो सरापबाट मलाई बचाइदिनुप¥यो सरकार ।’
