काठमाडौँ । ऊर्जा, जलस्रोत तथा सिँचाइमन्त्री विराजभक्त श्रेष्ठले भोटेकोशी र त्रिशूली नदीमा आएको विनाशकारी बाढीबाट प्रभावितहरूको उद्धार, राहत तथा पुनर्निर्माणलाई सरकारले उच्च प्राथमिकतामा राखेको बताउनुभएको छ ।
बुधवार बसेको प्रतिनिधि सभा बैठकमा विशेष समय लिएर बोल्दै मन्त्री श्रेष्ठले बाढीमा बेपत्ता भएकाहरूको खोजी कार्यलाई निरन्तरता दिँदै प्रभावित नागरिकको जीवनलाई सामान्य अवस्थामा फर्काउन सरकार पूर्ण रूपमा प्रतिबद्ध रहेको बताउनुभयो ।
गत भदौ १० गते आएको बाढीबाट भएको मानवीय तथा भौतिक क्षतिप्रति दुःख व्यक्त गर्दै उहाँले ज्यान गुमाएकाहरूप्रति श्रद्धाञ्जली तथा आफन्त गुमाएका परिवारजनप्रति समवेदना प्रकट गर्नुभयो । विपत्तिको यस घडीमा शोकलाई शक्तिमा बदल्दै नागरिकको भविष्य सुरक्षित बनाउनु सरकारको मुख्य चुनौती रहेको उहाँको भनाइ थियो ।
प्रतिकूल मौसम र भौगोलिक जटिलताका बाबजुद खोज तथा उद्धारमा अहोरात्र खटिएका सुरक्षाकर्मी, स्वास्थ्यकर्मी, कर्मचारी तथा स्वयंसेवकहरूको योगदानको मन्त्री श्रेष्ठले प्रशंसा गर्नुभयो । बाढीपीडितको सहयोगमा स्वदेश तथा विदेशबाट प्राप्त सहयोगप्रति पनि उहाँले आभार व्यक्त गर्नुभयो ।
मन्त्री श्रेष्ठले भन्नुभयो, “आँखा रसाएका छन् तर आशा मरेको छैन । विपत्तिको यो कठिन घडीमा सरकार नागरिकको साथमा छ । हाम्रो पहिलो दायित्व खोज तथा उद्धारलाई अन्तिम सम्भावनासम्म निरन्तरता दिनु, घाइतेहरूको उपचार गर्नु र क्षतिग्रस्त सडक, पुल तथा विद्युतीय संरचनाको पुनर्निर्माण गर्नु हो ।”
प्रतिनिधि सभामा उठेका प्रश्नहरूको जवाफ दिँदै उहाँले प्रधानमन्त्री बालेन्द्र साह र राष्ट्रिय स्वतन्त्र पार्टीका सभापति रवि लामिछानेबीच भएको संवाद तथा विपत्तिको समयमा राजनीतिक दलहरूबीच देखिएको ऐक्यबद्धताले सरकारलाई थप हौसला मिलेको बताउनुभयो ।
जनताको जीवनभन्दा ठूलो अर्को कुनै दायित्व हुन नसक्ने उल्लेख गर्दै मन्त्री श्रेष्ठले बाढीबाट क्षतिग्रस्त पूर्वाधारको पुनर्निर्माण विशेष योजनाका साथ अघि बढाउने प्रतिबद्धता व्यक्त गर्नुभयो ।
