काठमाडौं । नेपाली कांग्रेसका निवर्तमान सभापति एवं पूर्वप्रधानमन्त्री शेरबहादुर देउवाले न्यायालयले आफू र आफ्नो पार्टीलाई विगतदेखि नै न्याय दिँदै आएको उल्लेख गर्दै न्यायालयप्रति पूर्ण विश्वास रहेको बताउनुभएको छ।
कांग्रेसको संस्थापन पक्ष इतरको तीन दिने राष्ट्रिय भेला समापनका क्रममा आज उहाँले पञ्चायतकालदेखि नै आफू र आफ्नो पार्टीलाई न्यायालयले न्याय दिएको बताउनुभयो।
“विगतमा मलाई राजाले थुन्दा पनि न्यायालयले शाही आयोग खारेज गरेको हो। अहिले पनि हाम्रो पार्टीको आधिकारितासम्बन्धी विषय सर्वोच्च अदालतमा छ, न्याय पाइने अपेक्षा गरेका छौँ,” देउवाले भन्नुभयो।
विशेष महाधिवेशनले पार्टीमा विभाजन ल्याउने भन्दै आफूले त्यस्तो कदम नचाल्न आग्रह गरेको उहाँले स्मरण गर्नुभयो।
फरक प्रसङ्गमा देउवाले आफू हिन्दू धर्मावलम्बी भएको र हिन्दू संस्कार मान्दै आएको बताउँदै कसैलाई पनि हिन्दू धर्म मान्नबाट वञ्चित गर्न नहुने धारणा राख्नुभयो। उहाँले बुद्ध धर्मप्रति पनि आफ्नो उत्तिकै श्रद्धा रहेको उल्लेख गर्दै अन्य धर्मावलम्बी तथा प्राकृतिक धर्म मान्ने सबैप्रति सम्मान रहेको बताउनुभयो।
पूर्वप्रधानमन्त्री देउवाले पार्टीका नेता तथा कार्यकर्ताबाट आफूले ठूलो साथ र सद्भाव पाएको उल्लेख गर्दै त्यसलाई कहिल्यै नबिर्सने बताउनुभयो। उहाँ स्वास्थ्य उपचार सकेर पाँच महिनापछि बिहीबार मात्रै स्वदेश फर्कनुभएको थियो।
पार्टीका पूर्वमहामन्त्री एवं भेलाका संयोजक डा. शशाङ्क कोइरालाले पार्टीलाई एकताबद्ध बनाउन सम्मेलन आयोजना गरिएको बताउनुभयो। उहाँले सम्मेलनका कारण सबै नेता तथा कार्यकर्ताबीच भेटघाट र छलफलको अवसर जुटेको उल्लेख गर्दै भेलाले पाँचवटा प्रतिवेदन पारित गरेको जानकारी दिनुभयो।
