काठमाडौं । रहिम स्टर्लिङको ह्याट्रिकको सहयोगमा म्यान्चेष्टर सिटीले च्याम्पियन्स लिगमा प्रभावशाली जित निकालेको छ । मंगलबार राति भएको खेलमा सिटीले ईटालीको एटलान्टालाई ५–१ गोल अन्तरले हराएको हो । सिटीको स्टर्लिङ ह्याट्रिक गरेर नायक बने । खेलमा अग्रता एटलान्टाले २८ औ मिनेटमा रुस्लान मिलिनोवस्कीको गोलबाट लिएको थियो । ३४ औ मिनेटमा अग्युरोले सिटीका लागि बराबरी गोल गरे ।
त्यसको चार मिनेटपछि पेनाल्टीमा गोल गर्दै अग्युरोले सिटीलाई २–१ ले अघि बढाउन सफल रहे ।५८ औ मिनेटमा स्टर्लिङले ब्यक्तिगत रुपमा गोलको खाता खोल्दै सिटीलाई ३–१ को अग्रता दिलाए । ६४ औ मिनेटमा ब्यक्तिगत दोस्रो गोल गरेका उनले ६९ औ मिनेटमा ह्याट्रिक पुरा गरेका थिए ।
८२ औ मिनेटमा फोडिन रातो कार्ड खादै मैदान बाहिरिएपछि सिटी १० खेलाडीमा सिमित रहेर खेलको अन्त्य गरेको थियो । समूह सीको खेलमा सिटी सतप्रतिशत नतिजा सहित ९ अंक जोड्न सफल रह्यो ।
