इन्ग्लिश प्रिमियर लिग फुटबलमा म्यानचेस्टर युनाइटेडले सहज जित निकालेको छ । आइतबार राति भएको खेलमा नर्विच सिटीलाई ३–१ गोल अन्तरले युनाइटेडले पराजित गरेको छ । नर्विचको मैदानमा युनाइटेडलाई जित दिलाउन स्कोट टोमीने, मार्कोस राष्फोर्ड र एन्थोनी मार्सियलले एक एक गोल गरेका थिए ।
यता नर्विचका लागि भने ओनेल हर्नान्डेजले एक गोल फर्काएका थिए । खेलको २१ औं मिनेटमा स्कोटको गोलले युनाइटेडलाई सुरुवाती अग्रता दिलाएको थियो । युनाइटेडले स्कोटको गोलसँगै प्रिमियर लिगमा बिपक्षि टिमविरुद्ध २ हजार गोल पुरा गर्दै कीर्तिमान बनाउन सफल भएको छ । युनाइटेड लिगमा २ हजार गोल पुरा गर्ने युनाइटेड पहिलो क्लब बनेको छ ।
स्कोटको गोलबाट अग्रता बनाएको युनाइटेडले त्यसलगतै ३० औं मिनेटमा राष्फोर्डको गोलबाट अग्रता दोब्बर बनाउन सफल रह्यो । योसँगै राष्फोर्डले क्लबका लागि ५० गोल समेत पुरा गरे । उनले १८३ खेलमा क्लबका लागि ५० गोल पुरा गरेका हुन् । यस्तै मार्सियलले खेलको ७३ औं मिनेटमा गोल गर्दा युनाइटेडको अग्रता ३–० को बन्यो ।
त्यसपछि खेलको ८८ औं मिनेटमा नर्विचका हर्नान्डेजले एक गोल फर्काए पनि युनाइटेडले सहज जित निकाल्न सक्यो । जितसँगै युनाइटेड लिगको सातौं स्थानमा उक्लिएको छ । युनाइटेडले १० खेलमा १३ अंक जोडेको छ । पराजित नर्विच ७ अंक जोडेर पुछारबाट दोस्रो स्थानमा पुगेको छ ।
