इटालियन सिरी ‘ए’ फुटबलमा युभेन्ट्सले संघर्षपूर्ण जित निकालेको छ । बुधबार राति भएको खेलमाजिनोआलाई २–१ गोल अन्तरले युभेन्ट्सले पराजित गरेको हो । युभेन्ट्सको घरेलु मैदानमा दुवै टिम १० खेलाडीमा समेटिएको थियो । खेलमा सुरुवाती अग्रता युभेन्ट्सले नै बनाएको थियो ।
लियोनार्दो बोनुचीले खेलको ३६ औं मिनेटमा गोल गर्दै युभेन्ट्सलाई अग्रता दिलाएका थिए । तर, ४० औं मिनेटमा क्रिस्टियन कौआमेले गोल गर्दै जिओनालाई १–१ गोलको बराबरी फर्काउन सफल भएका थिए । खेलको ५१ औं मिनेटमा फ्रान्सिस्को कास्सटाले दोहोरो पहेलो कार्डसहित रातो कार्ड पाउँदा जिओना १० खेलाडीमा समेटियो । त्यस्तै एड्रिन राबिओटले खेलको ८७ औं मिनेटमा दोहोरो पहेलो कार्डसहित रातो कार्ड पाउँदा युभेन्ट्स पनि १० खेलाडीमा समेटियो ।
त्यसपछि खेलको ९० औं मिनेटमा क्रिस्टियानो रोनाल्डोले पेनाल्टीमा गोल गर्दै युभेन्ट्सलाई २–१ को संघर्षपूर्ण जित दिलाई छाडे । जितसँगै युभेन्ट्स लिगको शीर्ष स्थानमा समेत उक्लिएको छ । युभेन्ट्सले १० खेलबाट २६ अंक जोडेको छ । पराजित जिओना ८ अंक जोडेर १७ औं स्थानमा छ ।
