किएभ। चेर्नोबिल आणविक उर्जा केन्द्र वरपरको बहिष्करण क्षेत्रमा विशाल क्षेत्रमा डढेलो लागेको छ । डढेलोका कारण चेर्नोबिल आणविक प्लान्ट जोखिममा परेको छ ।
एक हजार १०० हेक्टर क्षेत्रमा फैलिएको वनमा लागेको डढेलो नियन्त्रणबाहिर रहेको युक्रेनी अधिकारीले बताएका छन् ।
“कडा हावा, सुख्खा मौसम र बारुदी सुरुङहरू रहेकोले उक्त क्षेत्रमा आगो निभाउने प्रयासमा उल्लेखनीय बाधा पुगेको र आगो द्रुत गतिमा फैलिरहेको छ,” युक्रेनी राष्ट्रिय आपतकालीन सेवाले एक विज्ञप्ति जारी गरी जानकारी गराएको छ।
आगो नियन्त्रणका लागि राज्यले आपतकालीन सेवाका एकाइ र अन्य निकायका कर्मचारीहरूलाई खटाएको छ ।
गृह मन्त्रालयका अनुसार स्थानीय समयअनुसार बिहान ११ बजेसम्म युक्रेनमा विकिरणको अवस्था भने स्थिर रहेको छ । डढेलोका कारण ‘गामा’ विकिरणको स्तर सामान्य सीमाभित्र छ। डढेलो समाचार तयार पार्दासम्म नियनत्रणमा आउन सकेको छैन ।
किएभबाट ११० किलोमिटर उत्तरमा रहेको चेर्नोबिल आणविक ऊर्जा केन्द्र सन् १९८६ को अप्रिल २६ मा इतिहासकै सबैभन्दा भयानक आणविक दुर्घटनाको स्थल थियो। प्लान्ट वरपरको ३० किलोमिटर क्षेत्रलाई पछि बहिष्करण क्षेत्रको रूपमा तोकिएको थियो।(रासस/एएफपी)
