काठमाडौँ । कास्की निर्वाचन क्षेत्र नम्बर ३ बाट राष्ट्रिय स्वतन्त्र पार्टी (रास्वपा) का तर्फबाट प्रतिनिधि सभा सदस्यमा निर्वाचित विना गुरुङले आफू राजनीतिक लाभका लागि नभई जनताको सेवा गर्ने उद्देश्यले राजनीतिमा आएको बताएकी छन् ।
प्रतिनिधि सभा सदस्यमा निर्वाचित भएको प्रमाणपत्र ग्रहण गरेपछि गुरुङले गाउँबस्तीमा पुग्दा आमाबुबाले भोगिरहेका पीडा र समस्याले आफूलाई गहिरो रूपमा प्रभावित बनाएको बताएकी हुन्। ती समस्याको समाधान खोज्ने जिम्मेवारी आफूले महसुस गरेको उनको भनाइ छ।
गुरुङले मतदाताबाट प्राप्त निवेदन तथा समस्यासम्बन्धी पत्रहरू व्यवस्थित रूपमा फाइलिङ गरेर राखेको जानकारी दिँदै ती सबैलाई अध्ययन गरी जनताको आवाज संसद्मा उठाउने प्रतिबद्धता जनाइन्। जनताले दिएको म्याण्डेटलाई सम्मान गर्दै विकासमुखी र परिणाममुखी कामलाई प्राथमिकता दिने उनले बताइन् ।
उनले भनिन्, “म कुनै राजनीतिक लाभका लागि होइन, कसरी जनताको सेवा गर्न सकिन्छ भन्ने उद्देश्यका साथ यहाँ आएको हुँ। गाउँबस्तीमा जाँदा देखिएका बुबाआमाको आँशु पुछ्न सकियोस् भन्ने चाहना छ। मतदाताले दिएका निवेदनहरू सबै फाइलिङ गरेर राखेको छु। फुर्सदको समयमा ती सबै अध्ययन गर्नेछु र जनताको आवाजलाई मेरो आवाज बनाएर सदनमा उठाउनेछु। हामी काम गर्नकै लागि आएका हौँ, काम नै हाम्रो मुख्य आवाज हो।”
मुख्य निर्वाचन अधिकृत हिमलाल बेल्वासेले गुरुङलाई प्रतिनिधि सभा सदस्यमा निर्वाचित भएको प्रमाणपत्र प्रदान गरेका थिए ।
कास्की निर्वाचन क्षेत्र नम्बर ३ मा गुरुङले ३७ हजार ७५० मत प्राप्त गर्दै विजयी भएकी हुन् । उनका निकटतम प्रतिद्वन्द्वी नेपाली काँग्रेसका मनोज गुरुङले १२ हजार ७८० मत प्राप्त गरेका छन् । यस्तै नेकपा एमालेका उम्मेदवार दमोदर बैरागीले ७ हजार ९०६, नेपाली कम्युनिष्ट पार्टीका गोपाल गिरीले १ हजार ४५६ तथा राष्ट्रिय प्रजातन्त्र पार्टीका अर्जुन खनालले १ हजार ४०६ मत प्राप्त गरेका छन्।
उक्त निर्वाचन क्षेत्रमा कुल ६५ हजार ४ सय ७ मत खसेको थियो।
