सर्लाही : बलरा नगरपालिकाका पूर्व मेयर अभयकुमार सिंह नेपाली कांग्रेसमा प्रवेश गरेका छन्। पछिल्लो समय लोकतान्त्रिक समाजवादी पार्टी (लोसपा)मा आबद्ध रहेका सिंहलाई गएराति गगनकुमार थापाले पार्टी प्रवेश गराएका हुन्।
सिंहलाई कांग्रेसमा स्वागत गर्न आयोजित कार्यक्रममा थापासँगै सर्लाहीका निवर्तमान सभापति सुरेन्द्र प्रसाद सिंहलगायतका नेताहरूको उपस्थिति रहेको थियो।
सिंह २०७४ सालको स्थानीय तह निर्वाचनमा तत्कालीन राष्ट्रिय जनता पार्टी (राजपा)बाट बलरा नगरपालिकाको मेयरमा निर्वाचित भएका थिए। २०७९ सालको स्थानीय तह निर्वाचनमा भने राजपा विभाजनपछि उनी लोसपाबाट मेयरका प्रत्याशी बनेका थिए। तर उक्त निर्वाचनमा रामाशंकर कुशवाहा सँग पराजित भएका थिए।
गएराति सिंहकै निवासमा पुगेर कांग्रेस सभापति थापाले उनलाई औपचारिक रूपमा पार्टी प्रवेश गराएका हुन्। सिंहसँगै बलरा नगरपालिकाका पूर्व वडाध्यक्ष सुशील झा लगायतका नेता तथा कार्यकर्ताहरू पनि नेपाली कांग्रेसमा प्रवेश गरेको जनाइएको छ।
यसअघि सर्लाही क्षेत्र नम्बर–४ निवासी लोसपाका नेता तथा पूर्व संविधानसभा सदस्य केदारनन्दन चौधरी, मनिष मिश्रलगायत दर्जनौँ नेता तथा कार्यकर्ताहरू पनि नेपाली कांग्रेसमा प्रवेश गरिसकेका छन्।
