काठमाडौं । नेपाल कानुन समाजले उच्च अदालत जनकपुरअन्तर्गत अस्थायी इजलास वीरगन्जका न्यायाधीश खुशीप्रसाद थारु र अर्जुन महर्जनमाथि भएको अभद्र व्यवहारप्रति आपत्ति जनाएको छ ।
न्यायाधीशहरुमाथि यही जेठ २९ गते केही व्यक्तिहरुले कार्यस्थलमै पुगेर अभद्र व्यवहार गरेका थिए ।
कानुन समाजले विज्ञप्ति जारी गर्दै घटनामा संलग्नलाई कानुनी कारबाही गर्न माग गरेको छ । ‘माननीय न्यायाधीशहरुको काम कारवाही र आचरणको अनुगमन तथा सुपरिवेक्षण गर्ने जिम्मेवारी न्याय परिषदको हो । न्याय सम्पादनको सिलसिलामा गरिएका निर्णयहरुको विषयलाई लिएर यस प्रकारको दुर्व्यवहार हुनु न्यायपालिका प्रतिको आक्रमण भएको र यसले न्यायपालिकाको स्वच्छता र मर्यादामा प्रतिकुल प्रभाव पार्दछ भन्ने नेपाल कानून समाजको धारणा रहेको छ’ कानुन समाजले जारी गरेको विज्ञप्तिमा भनिएको छ ।
‘नेपाल कानून समाज स्थापना कालदेखि नै कानूनको शासन, स्वतन्त्र र सक्षम न्यायपालिकाको पक्ष पोषण गर्दै न्यायपालिकाको गरिमा उच्च राख्न निरन्तर काम गर्दै आएको संस्था हो । नेपाल कानून समाज उच्च अदालतको विरगञ्ज इजलासमा घटाइएको उक्त घटनाको गम्भिर निन्दा र भत्सना गर्दै, उक्त घटनामा संलग्न व्यक्तिहरु माथि तत्काल कानूनी कारवाहीको माग गर्दछ । ’
