भानुभक्त रामभक्त
नेपालका आदिकवि
हजुरले लाउनु भो गुन
रामायण कथा रची ।।
नेपालीभाषा रोज्नुभो
रामायण लेख्नलाई
नेपाली जनले गाउन्
श्रीरामगाथा भन्नलाई ।।
अत्यन्त सुन्दर काव्य
रामायण भानुभक्तको
छन्दालंकार र भाव
त्रिशूली सरि बगेको ।।
अनवरत गरी श्रम
भानुले काव्य लेख्नुभो
नेपाली राष्ट्र भाषालाई
सुन्दर साहित्य दिनुभो ।।
घाँसीबाट लिई अर्ती
रामायण बनाउनुभो
घर घरमा रामको कीर्ति
मर्यादा ज्ञान दिनुभो ।।
तनहुँ जिल्ला चुँदी रम्घा
ग्राम आचार्य कूलमा
पितामह श्रीकृष्ण र
धनञ्जय पिता घरमा ।।
जन्मिनु भो भानुभक्त
कूल उज्वल पार्नुभो
रची रामायण काव्य
देश भाषा समृद्ध भो ।।
रामायणमहाकाव्य
रच्नुका साथ भाषाका
अन्यकृति भक्तमाला
प्रश्नोत्तरी आदिका ।।
साथै अर्को वधुशिक्षा
अरु फुटकर कविता
धेरै छन् भानुभक्तका
भाषा साहित्यका मीठा ।।
जीवनभरै गरी सेवा
नेपाल राष्ट्र र भाषाको
अक्षुण्ण कीर्ति राख्नुभो
सारा नेपाली जातिको ।।
