काठमाडौँ । नेकपा एमालेका उपाध्यक्ष युवराज ज्ञवालीले पार्टीभित्र अन्तरविरोध हुँदैमा नयाँ पार्टी गठन गर्नेकुरा राम्रो नभएको बताउनुभएको छ ।
शनिवार काठमाडौंमा एकदेव आलेको ५६ औं स्मृति दिवसमा आयोजित कार्यक्रमलाई सम्बोधन गर्दै उहाँले यस्तो बताउनुभएको हो । उहाँले नेकपा (एकीकृत समाजवादी) अध्यक्ष माधवकुमार नेपालप्रति लक्षित गर्दै पार्टीमा अन्तरबिरोध हुँदैमा पार्टी फुटाउनैपर्ने संकीर्ण सोचबाट मुक्त हुनुपर्ने बताउनु भयो ।
उहाँले सबै कम्युनिष्ट पार्टीहरुले समाजवादलाई एजेण्डा बनाएर अघि बढेको भएपनि एक ठाउँमा उभिन नसकेको बताउनु भयो । उहाँले मतभेद हुँदैमा पार्टी फुटाउने कुराको गहन विश्लेषण जरुरी रहेको बताउनु भयो ।
उहाँले भन्नुभयो, ‘सबै कम्युनिष्ट पार्टीहरुले आफ्नो लक्ष्य समाजवाद भन्नुभएको छ । सबैका डकुमेण्ट राखेर पढ्ने हो भने समानता धेरै पाइन्छ । तर जतिसुकै समानता भएपनि एक ठाउँ किन बस्न सक्दैनौँ । नेपालमा कम्युनिष्टहरु आपसमा मिल्न नसक्ने के रहेछ ? बुर्जुवाहरु त मिलिरहेका हुन्छन् । तुलनात्मक रुपले बुर्जुवा भन्दा कम्युनिष्ट पार्टी धेरै फुट्नुको कारण के हो ? यसको त कारण छ । हामीमा जडसूत्रवाद छ की, मनोवाद हाबी छ की ? संकीर्णता हाबी छ की ? अलिअलि मतभेद त जहाँ पनि हुन्छ । मतभेद नभएको दुनियाँमा कहाँ हुन्छ ? परिवारमा पनि अन्तरबिरोध हुन्छ । अनि हामी अलिकति अन्तरबिरोध हुँदैमा छुट्टिनैपर्ने, अर्को पार्टी बनाउनैपर्ने यो किन भएको छ ? यसको अलि राम्रो अध्ययन, विश्लेषण गर्नुपर्छ ।’
उपाध्यक्ष ज्ञवालीले अन्तरबिरोध हुने बित्तिकै पार्टी फुट्नैपर्ने, फुटाउनैपर्ने र सँगै बस्नै नसक्ने संकीर्णता तोडेर मिल्ने जति मिल्नुपर्ने बताउनु भयो ।
