काठमाडौँ । सहकारी ठगी मुद्दामा बयानका लागि पोखराबाट काठमाडौँ झिकाइएका पूर्वगृहमन्त्री तथा रास्वपा सभापति रवि लामिछानेको बयान आज पनि पूरा हुन सकेन ।
कामपा–१४ मा सञ्चालित स्वर्णलक्ष्मी सहकारी ठगी मुद्दामा आरोपित लामिछानेलाई बिहीबार बयानका लागि पोखराबाट काठमाडौं ल्याइएको थियो ।
भद्रकालीस्थित काठमाडौं प्रहरीको हिरासतमा राखिएका उनलाई शुक्रबार बिहानैदेखि जिल्ला सरकारी वकिलको कार्यालय, भद्रकालीमा बयानका निम्ति पठाइएको थियो ।आज दोस्रो दिनको बयान चलिरहेको भएपनि आजै बयान सकिने सम्भावना छैन ।
सोध्नुपर्ने विषय धेरै हुँदा उनको बयान आज पनि नसकिएको बताइएको छ । स्वर्णलक्ष्मी सहकारी पीडितद्वारा दिइएको जाहेरीमा उल्लेखित आरोप र अनुसन्धानबाट खुल्न आएका तथ्यमाथि आधारित भएर उनको बयान लिइँदैछ ।
भोलि बयान सकिए भोलि नै उनलाई पोखरा पठाइने छ ।
