एजेन्सी । साउथ अभिनेता नागा चैतन्य र शोभिता धुलिपलाको विवाहको कार्डको पहिलो झलक सार्वजनिक भएको छ । कार्डका अनुसार यस वर्षको डिसेम्बर ४ मा यी दुईबीच विवाह हुँदैछ । विवाह समारोह हैदराबादको अन्नपूर्णा स्टुडियोमा हुनेछ ।
यो स्टुडियो नागाका हजुरबुवा अभिनेता अक्किनेनी नागेश्वर रावले सन् १९७६ मा बनाएका थिए । यो स्टुडियो अक्किनेनी परिवारका लागि सम्पदा भन्दा कम छैन ।
नागा र शोभिताले केही समयअघि इन्गेजमेन्ट गरेका थिए । मिडिया रिपोर्टका अनुसार दुवैले नागा चैतन्यका पिता नागार्जुनको घरमा एक निजी समारोहमा इन्गेजमेन्ट गरेका थिए । नागार्जुनको घर हैदराबादको पोश क्षेत्र जुबली हिल्समा अवस्थित छ ।
सामन्थासँग सम्बन्धविच्छेदपछि नागा चैतन्यको नाम शोभितासँग जोडिन थाल्यो । दुवैले धेरै अन्तर्राष्ट्रिय यात्रामा सँगै समय बिताएको देखिएका छन् ।
यस बाहेक शोभिता आफ्नो फिल्म ‘मेजर’ को प्रमोशनका लागि बसेको होटलमा चैतन्य धेरै पटक देखिएका थिए । शोभिताले पनि आफ्नो जन्मदिन हैदराबादमै सेलिब्रेट गरिन् । यसपछि पनि नागा र शोभिता धेरै अवसरमा सँगै देखिएका छन् । त्यसयता दुवैले एकअर्कालाई डेट गर्दैछन् भन्ने अड्कलबाजी चलिरहेको थियो ।
सामन्था रुथ प्रभु र नागा चैतन्यले गोवामा ६ अक्टोबर २०१७ मा पहिले हिन्दू र त्यसपछि ७ अक्टोबरमा क्रिस्चियन रितीरिवाज अनुसार विवाह गरेका थिए ।
विवाहपछि सामन्थाले आफ्नो नाम बदलेर अक्किनेनी राखेकी थिइन्, तर सम्बन्धविच्छेदको खबरबीच सामन्थाले आफ्नो ट्विटर ह्यान्डलबाट अक्किनेनीलाई हटाएर सामन्था रुथ प्रभु राखेकी थिइन् ।
उनीहरु दुवैले अक्टोबर ६, २०२१ मा वैवाहिक जीवनको चार वर्ष पूरा गर्न लागेका थिए तर त्यसअघि नै उनीहरु छुट्टिए ।
