काठमाडौँ । नेपाली राष्ट्रिय फुटबल खेलाडीको तलबलाई लिएर विभिन्न समयमा टिकाटिप्पणी हुँदै आएको छ ।
केही समय पहिले राष्ट्रिय टोलीका महत्वपूर्ण सदस्यले एक टेलिभिजनमा दिएको अन्तर्वार्तामा खेलाडी र एन्फाको तलब र सेवा सुविधाबारे दिएको अभिव्यक्तिलाई लिएर सामाजिक सञ्जालमा खेलाडीहरुको तलब निकै दयनीय र एन्फाका पदाधिकारीले भने चर्को सेवा सुविधा र तलब लिने भन्दै आक्रोश पोखिएको थियो ।
घरेलु लिग समेत नभएको अवस्थामा खेलाडीको तलबलाई लिएर कुराहरु उठ्नु स्वभाविक नै हो ।
यसैबीच, अखिल नेपाल फुटबल संघ (एन्फा)को कार्यसमिति बैठक मंगलबार बिहान सुरु भएर अबेर चलेको थियो । सो बैठक बिहीबार बिहानसम्मलाई स्थगित गरिएको छ । आज बुधवार साफ यू–२० च्याम्पियनसिपको फाइनलको कारण बैठक बिहीबार जारी रहने छ ।
कार्यसमिति बैठकले महासचिव किरण राईको मासिक तलब २ हजार अमेरिकी डलर हुने निर्णय गरेको छ ।
एन्फा पंकज अध्यक्ष नेम्वाङले एजेण्डा नम्बर ८ मा कर्मचारीको सेवा सुविधाबारे छलफलमा महसचिवको तलब २ हजार अमेरिकी डलर अर्थात करिब २ लाख ७० हजार रूपैयाँ पुर्याउने प्रस्ताव राखेका थिए । उक्त एजेण्डामा केही सदस्यहरुले असन्तुष्टि देखाएपनि यो प्रस्ताव बहुमतले पारित भयो ।
हाल महासचिव किरण राईले १ लाख २० हजार मासिक तलब थाप्दै आएका छन् । साथै, बैठकले राष्ट्रिय खेलाडीको तलब १८ हजार रूपैयाँबाट मासिक ३० हजार पुर्याएको छ । यो निर्णय भने सर्वसम्मतले पारित भयो ।
यस्तै, बैठकले नेपाली राष्ट्रिय फुटबल टोलिका प्रशिक्षक भिन्सेन्जो अल्बर्टो एनेसको सम्झौता थप नगर्ने निर्णय पनि गरेको छ ।
सन् २०२३ को मार्चमा नेपाली राष्ट्रिय टोलीको प्रशिक्षक सम्हालेका एनेसको यसअघि तीन महिला सम्झौता थप गरिएको थियो ।
उनको प्रशिक्षणमा नेपालले थ्री नेसन्स कप फुटबल, साफ च्याम्पियनसिप, विश्वकप छनोट र केही मैत्रीपूर्ण खेलहरु खेलेको थियो । उनको प्रशिक्षणमा नेपालले प्रधानमन्त्री कप थ्री नेसन्स कपको उपाधि जितेको छ ।
उक्त प्रतियोगितामा नेपालसहित लाओस र भुटान सहभागी थिए । समग्रमा एनेसको प्रशिक्षणमा नेपालले कूल १६ खेल खेलेको छ । जसमा नेपालले जम्मा ४ खेल मात्र जितेको छ । यस्तै ३ खेल बराबरी खेल्दा १० खेलमा पराजय ब्यहोरेको छ ।
