काठमाडौँ । महिला एसिया कप २०२४ को फाइनल खेल आज भारत र श्रीलंकाबीच हुँदैछ । खेल रंगिरि डम्बुला स्टेडियम श्रीलंकामा नेपाली समयानुसार सवा ३ बजे सुरु हुनेछ ।
प्रतियोगितामा अहिलेसम्म दुवै टोलीको प्रदर्शन उत्कृष्ट रहेको छ । यस एसिया कपमा दुवै टोलीले अहिलेसम्म एउटा खेल पनि हारेका छैनन् ।
भारतीय टोली ९ औं पटक एसिया कपको फाइनल खेल्दै छ भने श्रीलंका छैटौं पटक फाइनलमा पुगेको छ । दुवै टोली लगातार दोस्रो पटक र कुल छैटौं पटक उपाधिका लागि भिड्दैछन् ।
एसिया कपको प्रत्येक फाइनलमा भारतले श्रीलंकालाई हराएको थियो ।
भारतीय महिला टोलीले पहिलो खेलमा पाकिस्तानलाई, दोस्रोमा युएईलाई, तेस्रोमा नेपाललाई र सेमिफाइनलमा बंगलादेशलाई पराजित गरेको थियो ।
त्यस्तै पहिलो खेलमा श्रीलंकाले बंगलादेशलाई, दोस्रोमा मलेसियालाई, तेस्रोमा थाइल्याण्डलाई र सेमिफाइनलमा पाकिस्तानलाई पराजित गरेको थियो ।
महिला एसिया कप सन् २००४ मा सुरु भएको थियो । उक्त उपाधि भारतले जित्यो । महिला एसिया कप ९ औं पटक आयोजना हुँदैछ । अहिलेसम्म भएका ८ संस्करणमा भारतले ७ पटक यस प्रतियोगिताको उपाधि जितेको छ भने बंगलादेशले एक पटक एसिया कपको उपाधि जितेको छ ।
