मेलवर्न । अष्ट्रेलियाविरूद्धको दोस्रो टेष्टमा भारतले पहिलो खेलबाट टोलीमा चार परिवर्तन गरेको छ। अष्ट्रेलियाले दोस्रो खेलमा टोलीमा कुनै परिवर्तन गरेको छैन। घरेलु टोलीविरुद्ध दोस्रो टेष्ट खेलमा भारतले युवा ब्याट्सम्यान सुभमन गिल र तीव्र गतिका बलर मोहम्मद सिराजले टेष्ट खेलमा डेब्यू गराएको छ।
गिललाई भारतले ओपनर पृथ्वी शा को स्थानमा मौका दिएको हो। शाले लगातार खराब प्रर्दशन गरेपछि गिलले टेष्टमा डेब्यू पाएका हुन् । तीव्र गतिका बलर मोहम्मद शामी घाइते हुँदा सिराजले उनको स्थान लिएका हुन् ।विकेटकिपर ऋद्धिमान शाहको स्थानमा युवा ब्याट्सम्यान ऋषभ पन्तले मौका पाएका छन्। शाहले पहिलो खेलमा खराब प्रर्दशन गर्दा भारतले पन्तलाई मौका दिएको हो ।
विराट कोहलीको स्थानमा भारतले अलराउन्डर रविन्द्र जडेजालाई खेलाइएको छ। कोहली भारत फर्किएका छन् । अजिन्का रहाणेको कप्तानीमा रहेको भारतले चेतेश्वर पुजारालाई उपकप्तानको जिम्मेवारी दिएको छ। भारत पहिलो खेलमा दोस्रो इनिङमा अष्ट्रेलियासँग एडिलेडमा ३६ रनमा अल आउट हुँदै आफ्नो टेष्ट इतिहासकै सबैभन्दा कम योगफलमा समेटिएको थियो।
मेलबर्न क्रिकेट मैदानमा शनिबार घरेलु टोली ब्याटिङ गरिरहेको छ। अष्ट्रेलियाली कप्तान टिम पेइनले टस जितेर पहिला ब्याटिङ गर्ने निर्णय लिएका हुन्। यो समाचार तयार पार्दासम्म घरेलु टोलीले २७ ओभरमा ६५ रन जोडेर ३ विकेट गुमाइसकेको छ।अष्ट्रेलियाका लागि जोय बर्नस् र स्टेभिन स्मिथ शून्यमा आउट भए भने म्याथ्यू वाइडले ३० रन जोडे। भारतका लागि रविचन्द्रन आश्विनले २ तथा जसप्रित बुमराहले १ विकेट लिए।
दोस्रो टेस्ट खेल्ने ११ खेलाडी :
भारत : सुभमन गिल, मयंक अग्रवाल, चेतेश्वर पुजारा, रविन्द्र जडेजा, अजिंक्या रहाने (कप्तान), हनुमा विहारी, ऋषभ पन्त (विकेटकिपर), रवीचन्द्रन आश्विन, उमेश यादव, मोहमद सिराज, जसप्रित बुमराह
अष्ट्रेलिया : जो बर्न्स, म्याथ्यु वेड, मार्नस लाबूसेन, स्टिभ स्मिथ, ट्राभिस हेड, क्यामरन ग्रिन, टिम पेइन (कप्तान तथा विकेटकिपर), प्याट कमिन्स, मिचेल स्टार्क, नाथन लायन, जोश हेजलवुड
