काठमाडौं । भावी रणनीति तय गर्न प्रमुख प्रतिपक्षी दल नेपाली कांग्रेसको संसदीय दल कार्यसमिति र संसदीय दलको बैठक आज बस्दैछ ।
संसदीय दल कार्यसमितिको बैठक संघीय संसद भवनस्थित दलका नेताको कार्यकक्षमा र संसदीय दलको बैठक संसद भवनको ल्होत्से हलमा बस्ने भएको हो ।
कांग्रेसले सहकारी ठगी प्रकरणमा उपप्रधान तथा गृहमन्त्री रवि लामिछानेमाथि छानबिन गर्न संसदीय समिति गठनको माग गर्दै आएको छ । तर सरकारले व्यक्तिको नाम किटान गरेर समिति बन्न नसक्ने अडान राखेपछि संसदमा कसरी प्रस्तुत हुने भन्ने विषयमा छलफल गर्न दलको बैठक बस्न लागेको हो ।
कांग्रेसले आइतबारको संसद् बैठकमा गृहमन्त्री लामिछानेलाई बोल्न दिएपछि आफूहरुलाई सभामुखले बोल्ने समय नदिएकोबारे पनि छलफल हुने एक नेताले जानकारी दिए ।
त्यस्तै प्रतिनिधिसभाको हिजोको बैठकमा उपप्रधान एवं गृहमन्त्री रवि लामिछानेले बोलेका विषय र कांग्रेसलाई लगाएका आरोपबारेमा समेत छलफल हुने बताइएको छ ।
महामन्त्री गगन थापाले आज बिहान ११ बजेसम्म सहकारी प्रकरणमा छानबिन समिति गठन नभए संसद बैठक चल्न नदिने बताइसकेका छन् ।
