काठमाडौँ । भारतीय क्रिकेट कन्ट्रोल बोर्ड (बीसीसीआई)ले मुम्बई इन्डियन्सका कप्तान हार्दिक पाण्ड्यालाई १२ लाख रुपैयाँ जरिवाना लगाएको छ ।
पञ्जाब किंग्सविरुद्ध मुम्बई इन्डियन्सको जितपछि बीसीसीआईले हार्दिक पाण्ड्यालाई यो सजाय दिएको हो । मुल्लानपुरमा भएको खेलमा स्लो ओभर रेटका कारण मुम्बई इन्डियन्सलाई लाखौं जरिवाना गरिएको छ ।
मुम्बईको टोलीले पञ्जाब किंग्सविरुद्ध निर्धारित समयमै ओभर पूरा गर्न नसकेपछि बीसीसीआईले हार्दिक पाण्ड्यालाई कारबाही गरेको हो । आईपीएलको न्यूनतम ओभर रेट अपराधसँग सम्बन्धित आचार संहिता अन्तर्गत यो सिजनको मुम्बई टोलीको पहिलो अपराध हो ।
मुम्बई इन्डियन्सको टोली निर्धारित समयभन्दा २ ओभर ढिलो दौडिरहेको थियो जसका कारण टोलीले १९ र २० औं ओभरमा ३० गजको सर्कलमा अतिरिक्त फिल्डर राख्नुपरेको थियो । तर, यसबाट मुम्बईलाई कुनै नोक्शानी भने भएन र मुम्बईले पञ्जाब किंग्सलाई ९ रनले पराजित गर्दै खेल जित्यो ।
चालू सिजनमा मुम्बई इन्डियन्सको यो पहिलो गल्ती थियो, जसका कारण बीसीसीआईले हार्दिक पाण्ड्यालाई १२ लाख रुपैयाँ जरिवाना लगाएको छ । यदि, मुम्बईको टोलीले दोस्रो पटक यस्तो गल्ती गर्छ भने कप्तान हार्दिकलाई १२ लाखको सट्टा २४ लाख रुपैयाँ जरिवाना हुनेछ । उनीहरु बाहेक अन्य खेलाडीलाई पनि कारबाही गरिने छ ।
