काठमाडौँ । च्याम्पियन्स लिग फुटबलमा इंग्लिस क्लब आर्सनल र जर्मन क्लब बायर्न म्युनिखले बराबरी खेलेका छन् ।
क्वाटरफाइनलको पहिलो लेग अन्तरगत दुबै टिमले २–२ गोलको बराबरी खेलेका हुन् । घरेलु मैदान इमिरेट्समा खेलको १२ औं मिनेटमा बुकायो साकाले गोल गर्दै आर्सनलाई सुरुवाती अग्रता दिलाएका थिए ।
१८ औं मिनेटमा सर्ज गनाब्रीले गोल गर्दै बायर्नलाई १–१ गोलको बराबरीमा ल्याए । यता, ३२ औं मिनेटमा बायर्नले पेनाल्टी पायो । आर्सनलका डिफेन्डर विलियम सलिबाले बायर्नले लेरोई सानेलाई डि–बक्स भित्र लडाएपछि बायर्नले पेनाल्टी पाएको थियो ।
ह्यारी केनले उक्त मौकाको सदुपयोग गर्दै गोल गर्दा बायर्न २–१ गोलले अघि बढ्यो । यस्तै, खेलको ७६ औं मिनेटमा बैकल्पिक खेलाडीको रुपमा आएका लियान्ड्रो ट्रोसार्डले गोल गर्दै आर्सनलको हार टारे ।
यस्तै दोस्रो लेगकै अर्को खेलमा स्पेनिस क्लब रियल मड्रिड र इंग्लिस क्लब म्यान्चेस्ट सिटीले पनि बराबरी खेलेका छन् । रियलको घरेलु मैदान सान्टियागो बर्नबेउमा दुबै टिमले ३–३ गोलको बराबरी खेलेका हुन् ।
खेलको दोस्रो मिनेटमा नै बर्नार्डो सिल्भाले गोल गर्दै सिटीलाई सुरुवाती अग्रता दिलाएका थिए । १२ औं मिनेटमा सिटीका रुवेन डियाजले आत्मघाती गोल गरेपछि रियल १–१ गोलको बराबरीमा आयो ।
यता, १२ औं मिनेटमा रोड्रिगोले गोल गर्दै रियललाई २–१ गोलले अघि बढाए । ६६ औं मिनेटमा फिल फोडेनको गोलमा सिटी २–२ गोलको बराबरीमा आयो । ७१ औं मिनेटमा जोस्को भार्डिओलले गोल गर्दै सिटीलाई ३–२ गोलले अघि बढाए ।
तर, ७९ औं मिनेटमा फेडेरिक भाल्भर्डेले गोल गर्दै रियल मड्रिडलाई ३–३ गोलको बराबरीमा ल्याउँदै हारबाट जोगाए । अब दोस्रो लेगका खेलहरु आगामी हप्ता हुनेछ । जहाँ बायर्नले आर्सनलको स्वागत गर्दा सिटीले रियलको आतिथ्य गर्नेछ ।
