काठमाडौं । प्रमुख प्रतिपक्षी दल नेपाली कांग्रेसलाई आगामी वैशाख १५ गते इलाम निर्वाचन क्षेत्र नं. २ को उपनिर्वाचनका लागि उम्मेदवार छान्नै सकस भएको छ ।
पार्टी सभापति शेरबहादुर देउवाको निवास बुढानिलकण्ठमा हिजो बसेको संसदीय बोर्डको बैठकले उम्मेदवार टुंगो लगाउन सकेन ।
सभापति देउवा र उपसभापति पूर्णबहादुर खड्काले तत्कालीन संविधानसभा अध्यक्ष सुवास नेम्वाङसँग पराजित डम्बर खड्कालाई नै उपनिर्वाचनमा उम्मेदवार बनाउनुपर्ने प्रस्ताव गरेका छन् । तर महामन्त्री विश्वप्रकाश शर्मा, सहमहामन्त्री भीष्मराज आङ्देम्बे र नेता शेखर कोइराला भेषराज आचार्यलाई टिकट दिनुपर्ने पक्षमा छन् । दुवै पक्ष अडानमा रहेपछि बैठक आजसम्मका लागि स्थगित गरिएको छ ।
एमाले, रास्वपा र राप्रपाले उम्मेदवार टुंग्याएर चुनावी प्रचार थालिसक्दा पनि इलाम २ को उम्मेदवार छान्न कांग्रेसले नसकेको हो । २४ चैतमा उम्मेदवारी मनोनयनको निर्वाचन कार्यतालिका छ ।
जिल्ला तहबाट ७ जनाको नाम सिफारिस भएको छ । तर केन्द्रमा दुई जनाको नाममा मात्र छलफल भइरहेको छ । आज २ बजे पुन: बैठक बस्ने र आकांक्षीको नाम टुंगो लगाउने तयारी छ ।
२०७९ सालको निर्वाचनमा कांग्रेस उम्मेदवार खड्का तत्कालीन संविधानसभा अध्यक्ष सुवास नेम्वाङसँग १ सय १४ मतले पराजित भएका थिए ।
