काठमाडौँ । प्रधानमन्त्री पुष्पकमल दाहाल ‘प्रचण्ड’ले बालकुमारी घटना सामान्य नभएर असामान्य भएको बताएका छन् । उनले सो घटना बाहिर देखिएजस्तो नभएको र चिज गम्भीर र असामान्य भएको आशंका गरेका छन् ।
उनले सोमबार राजधानीमा कांग्रेसले आयोजना गरेको कार्यक्रममा भने, चिज बेग्लै छ, यो घटना बाहिर देखिएजस्तो सामान्य छैन । भवितव्य मात्र पनि होइन । उनले सो कार्यक्रममा भनेका थिए ‘केही चिज गम्भीर लागेको छ । यो सामान्य छैन । दुई युवाको जस्तो परिवेशमा जसरी हत्या गरिएको छ र ईपीएसमा जे जस्ता गतिविधि भएका छन् ती सामान्य मात्र छैनन् । गाडी जलाउने गतिविधिमा मात्र चिज सीमित छैन ।
प्रधानमन्त्री दाहालले बालकुमारी घटना लोकतन्त्र र गणतन्त्रविरुद्धको डिजाइन हुनसक्ने आशंका व्यक्त गर्दै भने, ‘त्योभित्र अर्कै केही छ भन्ने मैले अनुभूत गरेको छु । यो कहीँ लोकतन्त्र र गणतन्त्रविरुद्धको डिजाइन हुन सक्छ तर यसबारे कुनै प्रमाण भेटाइ सकिएको अवस्था भने छैन । त्यसैले यसको अनुसन्धान गर्न उच्चस्तरीय छानबिन आयोग बनाइएको पनि उनले खुलासा गरे ।
के प्रधानमन्त्रीले आशंका गरेजस्तै हो त बालकुमारी घटना ? हिजोको संसदको राज्य व्यवस्था समितिको बैठकमा आएका कतिपय विरोधाभासपूर्ण भनाई र सूचनाबाट पनि यो घटना सामान्य रुपमा मन्त्रीको गाडी जलाएपछि उत्पन्न भएको हो भन्न सकिँदैन । किनभने आन्दोलन गरिरहेको भिडभाडमा मन्त्री जानु र मन्त्रीका सुरक्षा गार्डले यसबारेमा कुनै रिपोर्टिङ प्रहरी सेलमा नगर्नु पनि शंकास्पद देखिन्छ ।
हिजोको बैठकमा गृहमन्त्री नारायणकाजी श्रेष्ठले मन्त्री किन आन्दोलनमा गएको ? सुरक्षाकर्मीले किन सूचना नदिएको जस्ता कैयौँ प्रश्न गरे । उनले मन्त्री गएकाले नै त्यो दुर्घटना भएको ठोकुवा पनि गरे । उनकै सूचनासँग मिल्दोजुल्दो सूचना दिए प्रहरी महानिरीक्षक वशन्त कुँवरले पनि । अझ उनले त गोली कतिबेला चल्यो भन्ने कुरा अनुसन्धान हुनै बाँकी रहेको बताए ।
संसदीय समितिमा महानिरीक्षक कुँवरले मन्त्री प्रकाश ज्वालाको गाडीमा आगजनी गर्नु अगावै पनि गोली चलेको हुनसक्ने खुलासा समेत गरे । मन्त्रीको गाडी जलाउने तयारी भयो, मन्त्री घेराबन्दीमा छन् भनेपछि गोली चलाउन प्रहरी बाध्य भएको उनको भनाई थियो । तर अहिले बजारमा आएको सूचना चाहिँ गाडी जलाएपछि पनि हुलहुज्जत बढेकाले गोली चलाउनुपरेको भन्ने छ ।
हिजो नै मन्त्री ज्वालाले न्युज एजेन्सी नेपालसँगको कुराकानीमा फेरि अर्कै सूचना दिएका छन् । आफूमाथि गृहमन्त्री र महानिरीक्षक खनिएको भन्दै उनले जहाँ गाडी जलाइएको छ त्यहाँ गोली नचलेको र जहाँ गोली हानेर मान्छे ढालिएको छ त्यहाँ पछि आन्दोलन पनि नभएको भनेका छन् । उनको यो भनाईबाट पनि उक्त घटनाका प्रति थप शंका पैदा गर्ने आधारहरु भेटिन्छन् । जेहोस, प्रधानमन्त्री दाहालले यो घटनामा प्रजातन्त्र मास्ने षड्यन्त्र देखेका छन् । उनको आशंका छ बाहिर देखिने जति मात्र यो होइन, भित्र अर्कै षड्यन्त्र छ ।
