काठमाडौँ । नेकपा (माओवादी केन्द्र) का सांसद वर्षमान पुनले नेपालमा संस्कृति नीति बनाउन जरुरी देखिएको बताउनुभएको छ ।
शुक्रवार सिंहदरबारमा बसेको अन्तर्राष्ट्रिय सम्बन्ध र पर्यटन समितिको बैठकमा बोल्दै उहाँले यस्तो बताउनुभएको हो । उहाँले नेपालमा संस्कृति नीति नभएका कारण विभिन्न धार्मिक र सांस्कृतिक विद्वेष फैलिरहेको उल्लेख गर्नुभयो । उहाँले संस्कृति, पर्यटन तथा नागरिक उड्डयन मन्त्रालयलाई संस्कृति नीति बनाउन समितिले निर्देशन दिनुपर्ने बताउनु भयो । उहाँले धरानका जस्ता घटनाहरु नेपालमा बढीरहेको भन्दै प्रश्न उठिसकेपछि सरकारले सम्बोधन गर्नुपर्ने बताउनु भयो ।
उहाँले भन्नुभयो, ‘सनातन धर्मका बारेमा एकले एकथोक र अर्कोले अर्कोथोक भनिरहेको छ । त्यसलाई कसरी प्रयोग गर्छौं त । यो खालको कुरा नीति नभएको देखिन्छ, नेपाल सरकारको । एउटा निर्देशन जरुरी छ । धर्मनिरपेक्षतामा कस्तो नीति हुन्छ भन्नेकुरामा जोड दिनुपर्छ । धरानजस्ता घटना बढेर गएका छन् ।’
‘एउटा मन्दिर बनायो, धर्म मान्नेका लागि आस्थाको केन्द्र भयो, नमान्नेका लागि सांस्कृतिक सम्पदा हुँदो रहेछ । सांस्कृतिक सम्पदाको नीति के हुन्छ ? धार्मिक केन्द्रमाथिको नीति के हुन्छ ? प्रश्न उठेपछि राज्यले सम्बोधन गर्नुपर्छ । अलिखित मान्यता थियो तर अब समयको मागले लिखित माग गर्दै गइएको छ । आज नयाँ ढंगले व्यवस्थित गर्नुपर्छ । त्यसैले हामीलाई संस्कृति नीति जरुरी देखिन्छ । नीति बनाउन निर्देशन दिनुपर्ने देखिन्छ । धर्म निरपेक्ष सम्बन्धी र यसलाई व्यवस्थित गर्न आवश्यक कानूनको परिमार्जन गर्न निश्चित मर्यादा बनाउनुस् भन्नुपर्ने हुन्छ ।’
सांसद पुनले धर्म निरपेक्ष सम्बन्धी नीति र यसलाई व्यवस्थित गर्न आवश्यक कानूनको परिमार्जन गर्न निश्चित मर्यादा बनाउनुपर्ने पनि बताउनु भयो ।
